"ცრუ იმედების გაჩენა არ მინდა", - პრეზიდენტმა დაადასტურა, რომ სუარესი ნასიონალს ტოვებს
ლუის სუარესი მშობლიურ „ნასიონალს“ ნოემბერში დატოვებს.
„ლივერპულის“ და „ბარსელონას“ ექს-ფორვარდი ურუგვაულ გუნდთან კონტრაქტს არ გაახანგრძლივებს, რომელიც 2022 წლის მსოფლიო ჩემპიონატის დაწყებამდე მოქმედებს.
„ქვეყნის ჩემპიონატი დასრულდება და ლუის სუარესი „ნასიონალს“ დატოვებს, ცრუ მოლოდინების შექმნას არ ვაპირებ. სუარესმა უდიდესი შრომა გასწია, რომ „ნასიონალში“ გადმოსულიყო და ყოველთვის, როცა მეკითხებიან, ვამბობ, რომ ის წავა, რათა მომავლისთვის ცრუ მოლოდინები არ გავაჩინო.
ის წავა, რაც თავადაც არაერთხელ დაადასტურა.“ - აღნიშნა „ნასიონალის“ პრეზიდენტმა ხოსე ფუენტესმა.
„ნასიონალში“ სუარესმა პროფესიონალურ დონეზე თავისი სადებიუტო სეზონი ჩაატარა (2005/06) და გუნდში ივლისში დაბრუნდა, როცა „ატლეტიკოსთან“ კონტრაქტი ამოეწურა.
ამ სეზონში ელ პისტოლერომ ურუგვაულ გუნდში 10 მატჩში 4 გოლი და 3 საგოლე გადაცემა მიითვალა.
