დაბრუნება იქ, საიდანაც ყველაფერი დაიწყო — ნეიმარი სანტოსს უახლოვდება

ფაბრიციო რომანოს ინფორმაციით, ნეიმარ ჟუნიორი მშობლიურ სანტოსში დაბრუნებასთან ახლოსაა - ბრაზილიურმა კლუბმა ალ ჰილალს იჯარის თაობაზე შეთავაზება უკვე გაუგზავნა.

ბრაზილიელი ვარსკვლავი ალ ჰილალში 2023 წელს გადავიდა და მას შემდეგ, ტრავმების გამო, მხოლოდ 7 მატჩი ჩაატარა (1 გოლი, 3 ასისტი).

ნეიმ, დაზიანებების გამო, საუდის არაბეთში გადაბარგების შემდეგ 68 შეხვედრა გამოტოვა. ერთ-ერთი ტრავმის “წყალობით” მას 1 წელი გაუცდა, დაბრუნების შემდეგ კი, მეორე მატჩშივე, კვლავ დაშავდა. ის მოედანზე ბოლოს გასული წლის 4 ნოემბერს, ირანული ესტეღლალის (3-0) წინააღმდეგ ვიხილეთ. მანამდე, ჟუნიორი მწვანე მინდორზე 2024 წლის 21 ოქტომბერს, საამიროების ალ აინთან შეხვედრაში (5-4) გავიდა - ეს 2023 წლის 19 ოქტომბრის შემდეგ მისი პირველი მატჩი იყო. ნეიმარმა 2024 წელს არაბული კლუბის მაისურით მხოლოდ 2-ჯერ ითამაშა (ჯამში: 42 წუთი) და ხელფასის სახით €101 მილიონი ჩაერიცხა. 

ჟუნიორს “ლურჯი ტალღებთან" კონტრაქტი 2025 წლის 30 ივნისამდე აკავშირებს (+1 წლის ოფციით). არაბულმა კლუბმა ის საუდი პრო ლიგის მეორე წრისთვის გუნდში არ დაარეგისტრირა. ალ ჰილალის მთავარმა მწვრთნელმა, ჟორჟე ჟესუსმა ისიც კი თქვა, რომ ბრაზილიელი მათ დონეს ვერ აკმაყოფილებს.

ნეიმარი სანტოსის აღზრდილია და ძირითად გუნდში 2009-2013 წლებში ასპარეზობდა. მან მშობლიური კლუბის მაისურით 225 მატჩი ჩაატარა, 136 გოლი გაიტანა და 64 ასისტი მიითვალა. ნეიმ სანტოსთან ერთად 2010/11 წლების სეზონში ლიბერტადორესის თასიც მოიგო.