„დარწმუნებული ვარ, მომდევნო 5 წელში ტორპედო ჩემპიონი რამდენჯერმე გახდება“, - კლუბის პრეზიდენტი დიდი გეგმებით

ამის ერთ-ერთი მთავარი შემოქმედი კი „ტორპედოს“ პრეზიდენტი, „ნიუ ვიჟენ უნივერსიტეტის“ რექტორი დავით კერესელიძეა.

GOAL.GE-მ კერესელიძესთან ვრცელი, ექსკლუზიური ინტერვიუ ჩაწერა.

„ტორპედოს“ წელს განსხვავებული, ევროტურნირზე ღირსეულ გამოსვლასთან დაკავშირებული ამოცანები აქვს გადასაწყვეტი. კონფერენს ლიგაზე
წარმატებისთვის არაერთი ჩვენზე დამოკიდებული და ნაწილობრივ ჩვენგან დამოუკიდებელი ფაქტორის (საკვანძო ფეხბურთელების ტრამვები, წილისყრა და ა.შ.) თანხვედრა იქნება მნიშვნელოვანი. ჩვენი ამოცანაც სწორედ ჩვენი გავლენის ქვეშ არსებული ფაქტორების სწორად წარმართვაა. ამ თვალსაზრისით პირველი მნიშვნელოვანი ეტაპი გუნდის ახალი ფეხბურთელებით გაძლიერება იყო. ბევრი ფეხბურთელი შეკრებაზე სინჯზე იმყოფებოდა, ნაწილი გუნდში ჩაირიცხა, ზოგი კი სხვა გუნდებს შევთავაზეთ. წელს 5-6 ლეგიონერი, თუმცა სამწუხაროდ ნაკლები ქუთაისის ტორპედოს აღზრდილი ფეხბურთელი გვეყოლება. ამ თვალსაზრისით ამ წელს გარდამავალ პერიოდად ვუყურებთ. იმედია, ძალიან მალე „ტორპედოს“ ასაკობრივი გუნდებიდან მოსული ფეხბურთელები გუნდს მნიშვნელოვნად გააძლიერებენ. 

ეროვნულ ლიგაში კონკრეტულ მიზანს არ ვისახავთ, ვინაიდან დარწმუნებულები ვართ, რომ „ტორპედო“ მომდევნო 5 წლის განმავლობაში
რამდენჯერმე გახდება საქართველოს ჩემპიონი. ეს წელს მოხდება, შემდეგ თუ იმის შემდეგ წელს, მნიშვნელოვანი არ არის. ამჟამად ჩვენი მიზანი თანამედროვე საფეხბურთო კლუბის ჩამოყალიბებაა, მექანიზმის თითოეული რგოლის სწორად ამუშავება, მათ შორის ჩვენი გუნდის წევრების შესაბამისი განათლებით უზრუნველყოფის ნაწილშიც.

განათლება ფეხბურთში მართლაც აუცილებელია.. რა კონკრეტული გეგმები გაქვთ ამ საკითხთან დაკავშირებით?

მიკვირს, როცა ფეხბურთელები გვეუბნებიან, რომ არ იციან, როგორი იქნება მათი ცხოვრება კარიერის დასრულების შემდეგ. მოგეხსენებათ, როგორც უნივერსიტეტს შეგვიძლია ფეხბურთელების განათლებაში არსებულ ხარვეზებზე მუშაობა და მათი კარიერის დაგეგმვის ხელშეწყობა. ეს მნიშვნელოვანია როგორც აქტიურ სპორტში ყოფნის, ისე პროფესიული კარიერის დასრულების შემდეგ პერიოდშიც. მათ შორის ამ მიზნითაც
დავაფუძნეთ „ნიუ ვიჟენში“ სპორტის მეცნიერების ფაკულტეტიც, რომელსაც უცხოელი სპეციალისტები უხელმძღანელებენ. ეს არ იქნება მხოლოდ „ტორპედოზე“ მორგებული საქმიანობის მიმართულება. გვსურს, სხვა კლუბებთანაც ვითანამშრომლოთ.  უნივერსიტეტი ყველაფერს გააკეთებს, რომ ფეხბურთელებს პროფესიის არჩევის საშუალება ჰქონდეს. 

მაგალითად, „ტორპედოს“ ფეხბურთელმა თორნიკე ახვლედიანმა მითხრა, რომ არქიტექტურის სწავლა უნდა. რატომაც არა? არ არის აუცილებელი, ფეხბურთელი კარიერის დასრულების შემდეგ, მაინცდამაინც მწვრთნელი გახდეს.

გვყავს გერმანელი სპეციალისტები, რომლებიც ამ მიმართულებით აქტიურად მუშაობენ. სეზონი მოახლოვდა და ზოგ ფეხბურთელზე კონკრეტული გადაწყვეტილების მიღება ნაჩქარევად გვიწევს, თუმცა შემდეგი სატრანსფერო ფანჯრიდან ასე აღარ იქნება. „ტორპედო“ შემდეგი ორი ფანჯრისთვის მზადებას აქედანვე იწყებს, ვაკვირდებით ჩვენთვის საინტერესო ფეხბურთელებს და ახლავე ვმუშაობთ იმაზე, თუ ვინ, საიდან და რა პირობებით შეგვიძლია წამოვიყვანოთ. პარალელურად ვმუშაობთ ახალი ანალიტიკური პროგრამის დანერგვაზეც, რაც ბევრ სიახლესთან ერთად, არსებული ფეხბურთელების შემდგომი კარიერის დაგეგმვაშიც დაგვეხმარება.

ვაცნობიერებთ, რომ ჩვენ ქართული ფეხბურთის ნაწილი ვართ. შეუძლებელია, განვითარდე, თუ ეროვნული ლიგის დონეც პარალელურად არ განვითარდება. ჩვენი მიზანია, გაძლიერდნენ სხვა ქართული გუნდებიც და წარმატებებს ევროტურნირებზე ერთად მივაღწიოთ. ყოველ წელს საქართველოს ჩემპიონატსა და თასს რომელიმე ქართული გუნდი აუცილებლად მოიგებს, ამიტომ უნდა ვიფიქროთ იმაზე, რომ წარმატების საზომი საერთაშორისო ასპარეზზე ღირსეული გამოსვლაა. ამ თვალსაზრისით ფართოდ ვთანამშრომლობთ სხვა ქართულ კლუბებთანაც, ვინაიდან მიზანი ერთია - ყველამ ერთად უნდა გავიმარჯვოთ. 

ჩვენ ფეხბურთში წარმატებას ვუყურებთ როგორც საზოგადოების გაჯანსაღების შესაძლებლობას - წარმატებულის სულისკვეთების გაღვივებას. ისიც ვიცით, მინიმუმ 5 წელი სჭირდება იმას, რომ ყველანი კმაყოფილები ვიყოთ. ვიღაცისთვის შედეგი თუნდაც წინა წელს იყო, როცა თასი ავიღეთ, ვიღაც 3 წლის შემდეგ იტყვის, რომ სპორტული შედეგები და ხარისხი გაუმჯობესებულია. დროებითი წარუმატებლობა გულის აცრუების საფუძველი კი არ არის, არამედ ახალი შესაძლებლობაა, უკეთ დავინახოთ სად არის პრობლემა.

როგორც საკვანძო ადმინისტრაციული პერსონალის, ისე მწრთნელების მომზადებისა თუ გადამზადების კუთხით გარკვეული პროექტების
განხორციელებას უახლოეს მომავალში დავიწყებთ. ჩვენი და ჩვენი კოლეგების მიერ შემუშავებულ სიახლეებს ეტაპობრივად გავუზიარებთ როგორც ქართველ, ისე უცხოელ სპეციალისტებს. რეალურად რომ ვთქვათ, ჯერ კიდევ ბევრი გვაქვს ყველას ერთად სასწავლი.

ჩვენ გვსურს, კლუბის განვითარებას ხელი შევუწყოთ და ტალატებს ვეძებდეთ ქვეყნის შიგნითაც და გარეთაც. იდეალურ შემთხვევაში, ბედნიერი ვიქნები, თუ გუნდს „ტორპედოს“ აღზრდილი ფეხბურთელებით დავაკომპლექტებთ და გპირდებით, ადრე თუ გვიან, ეს მოხდება. ხოლო ამ ეტაპზე, სანამ ბავშვთა ფეხბურთის განვავითარების სხვადასხვა ასპექტზე ვმუშაობთ, იძულებულები ვართ, ტალანტები უცხო ქვეყნიდან ჩამოვიყვანოთ.

ერთ-ერთი მთავარი მიმართულება სწორედ ესაა. თვითმიზანი არ არის ის, რომ „დინამოს“ რამეში შევეჯიბროთ. პირიქით, რაც უფრო მეტი ასეთი აკადემია იქნება, უკეთესია. ბოლო 2 წელია მარტვილის აკადემიასთანაც ვთანამშრომლობთ. აკადემიის სტატუსი მოიპოვა „ტორპედომაც“ და კიდევ უფრო მეტი სამუშაოა ჩასატარებელი, რომ ეს ყველაფერი სისტემურ განვითარებაში გადაიზარდოს. 

ქუთაისი არის ქალაქი, სადაც ფეხბურთი ძალიან უყვართ. ჰპირდებით თუ არა ქუთაისელ გულშემატკივარს, რომ იხილავენ ისეთ „ტორპედოს“, როგორიც აქამდე არასდროს უნახავთ?

კარგი ფრაზაა. მიზანიც სწორედ ეს არის. ამის დაპირება შემიძლია, რადგან ჩვენ ერთად ვქმნით გამართულ საფეხბურთო მექანიზმს, რომელმაც გვინდა რაც შეიძლება მალე იმუშაოს. როგორც უკვე ვთქვი, მხოლოდ შიდა ჩემპიონატში მიღწეული წარმატება არ კმარა. ამიტომ, მსურს „ტორპედოთი“ არამხოლოდ ქუთაისელმა ხალხმა, არამედ მთელმა საქართველომ იამაყოს.