დღეს ევროსეზონი ოფიციალურად იხსნება - რეალი სუპერთასზე ევროპა ლიგის სენსაციას დაუპირისპირდება

დღეს, ევროპული საფეხბურთო სეზონი 2022/23 ოფიციალურად იხსნება.

ევროპის სუპერთასის შეხვედრაში ჩემპიონთა ლიგის გამარჯვებული მადრიდის „რეალი“, ევროპა ლიგის ტრიუმფატორს, ფრანკფურტის „აინტრახტს“ დაუპირისპირდება.

შეხვედრას ფინეთის დედაქალაქი ჰელსინკის ოლიმპიური სტადიონი უმასპინძლებს თბილისის დროით 23:00 საათზე.

მადრიდულმა კლუბმა აღნიშნული ჯილდო შესაძლოა ისტორიაში მეხუთედ მოიგოს და რეკორდსმენებს, „მილანს“ და „ბარსელონას“ გაუტოლდეს ამ მაჩვენებლით. „აინტრახტისთვის“ კი პოტენციური წარმატება ისტორიაში პირველი იქნება.

გერმანულ გუნდს ამ მატჩში ლიდერი ფილიპ კოსტიჩი ვერ დაეხმარება, რადგან სერბი ფეხბურთელი ტურინის „იუვენტუსში“ გადასვლასთან ძალიან ახლოსაა. „რეალს“ კი, აღნიშნულ შეხვედრაში ყველა ფეხბურთელი განაცხადში ჰყავს, მათ შორის ახალწვეულები ორელიან ჩუამენი და ანტონიო რუდიგერიც.