დღეს - ინგლისური კლასიკა, რომელმაც შესაძლოა ინგლისის ჩემპიონის ბედი ოფიციალურად გადაწყვიტოს

საქართველო 2 მაისს აღდგომას აღნიშნავს, მაგრამ საფეხბურთო ციებ-ცხელებაში დღეს ნამდვილად არის მატჩი, რომლისთვისაც შეიძლება შენი ცხოვრების საათნახევარი გამოყო.

„მანჩესტერ იუნაიტედი“ – „ლივერპული“

კვირა, 2 მაისი, 19:30 – „ოლდ ტრაფორდი“, მანჩესტერი. მთავარი არბიტრი - მაიკლ ოლივერი.

„მანჩესტერ იუნაიტედი“ მთელი სეზონია არაერთგვარ შთაბეჭდილებას ტოვებს - თუ გუნდის თამაშსა და შედეგებზე ვილაპარაკებთ. ოლე-გუნარ სოლსკიაერის კოლექტივი ჩემპიონობის აშკარა პრეტენდენტის სტატუსის მფლობელიც იყო, თუმცა ეს ცოტა არ იყოს ხანმოკლე აღმოჩნდა. რა თქმა უნდა, „მან.სიტი“ ამ სეზონში ყველა ფრონტზე აშკარად უფრო ძლიერი აღმოჩნდა, მაგრამ „წითლებმა“ ინტრიგის სიკვდილში თავისი წვლილიც შეიტანეს და აუთსაიდერებთან ქულები არაერთხელ დაკარგეს. 

სწორედ „ვესტ ბრომვიჩთან“ ფრეების და „შეფილდ იუნაიტედთან“ წაგებების გამო, გუნდი ინგლისის ჩემპიონობისთვის დიდი ხანია ვერ იბრძვის და ლიდერ „სიტის“ მიეცა შანსი ჩემპიონობა საკმაოდ ადრე გაენაღდებინა. თუმცა, მანკუნიანელებს ამ სეზონში ტიტულის მოგების შანსი ჯერ კიდევ აქვთ - გუნდი ევროპა ლიგის ფინალთან ერთ ნაბიჯშია, რადგან ნახევარფინალის პირველ მატჩში „რომა“ 6:2 გაანადგურა. 

ჩემპიონთა ლიგაზე „რეალთან“ მარცხის შემდეგ, „ლივერპულისთვის“ ამ სეზონის ერთადერთ მოტივაციად ოთხეულში შესვლა დარჩა. არანაირი ეჭვი არ არსებობს, რომ სწორედ ეს არის იურგენ კლოპის გუნდისთვის ამ კატასტროფული სეზონის გადარჩენის ერთადერთი გზა. ამ ეტაპზე, „წითლები“ 54 ქულით მე-6 პოზიციას იკავებენ.

ბოლოსწინა ტურში „ლივერპულმა“ „ლიდსთან“ გამარჯვება მატჩის მიწურულს გაუშვა ხელიდან, ამის შემდეგ კი „ნიუკასლთანაც“ იგივე ანგარიში დააფიქსირა - 1:1. თუ კლოპის კოლექტივი ქულების კარგვას გააგრძელებს, ჩემპიონთა ლიგაზე გასვლა შეუძლებელი გახდება.

საინტერესოა, რომ დღევანდელ შეხვედრაში „ლივერპულმა“ შესაძლოა ინგლისის ჩემპიონობის საკითხი საბოლოოდ მოაგვაროს - თუ კლოპის გუნდმა „მანჩესტერ იუნაიტედს“ მოუგო, „სიტი“ ინგლისის ჩემპიონი ოფიციალურად გახდება.

ბუკმეიკერების აზრით, ამ მატჩს ფავორიტი პრაქტიკულად არ ჰყავს - „ლივერპულის“ მოგების კოეფიციენტი 2.65 შეადგენს, „მანჩესტერ იუნაიტედის“ კი - 2.70.

სავარაუდო შემადგენლობები: 

„მანჩესტერ იუნაიტედი“: ჰენდერსონი - ვან ბისაკა, ბაილი, მაგუაირი, შოუ - მაკტომინეი, ფრედი, ბრუნო - პოგბა, გრინვუდი, რაშფორდი. 

„ლივერპული“: ალლისონი - ალექსანდრ არნოლდი, ფაბინიო, კაბაკი, რობერტსონი - ალკანტარა, მილნერი, ვეინალდუმი - სალაჰი, მანე, ფირმინო.

საინტერესო ციფრები:

„მანჩესტერ იუნაიტედმა“ „ლივერპულის“ წინააღმდეგ ბოლო 15 საშინაო შეხვედრიდან მხოლოდ 1 წააგო (10 მოგება და 4 ფრე) და ბოლო 8 მატჩში საერთოდ წაუგებელია. თუმცა, სტუმრად, გუნდმა ბოლო 9 მატჩიდან მხოლოდ 1 მოიგო (6 ფრ ედა 2 წაგება)

„ლივერპულმა“ პრემიერ ლიგის ბოლო 7 გასვლითი მატჩიდან 5 მოიგო - იმაზე მეტი, ვიდრე წინა 15 გასვლით მატჩში (4 მოგება, 6 ფრე, 5 წაგება). „მანჩესტერ იუნაიტედი“ კი 2018 წლის მარტის შემდეგ პირველად, ზედიზედ მეხუთე საშინაო გამარჯვებისკენ გაიწევს

თუ „მანჩესტერ იუნაიტედი“ დღეს „ლივერპულთან“ მატჩში მარცხს გადაურჩება, ოლე-გუნარ სოლსკიაერი თავის ყველაზე ხანგრძლივ წაუგებელ სერიას გაიმეორებს (14 მატჩი, წინა სეზონის ბოლოს).

მარკუს რაშფორდმა „ლივერპულთან“ ბოლო 4 საშინაო შეხვედრაში 4 გოლი გაიტანა - საპირისპირო მდგომარება აქვს რობერტო ფირმინოს, რომელმაც „იუნაიტედს“ 14 მატჩში მხოლოდ 1 გოლი გაიტანა და სადიო მანეს (11 მატჩი, 1 გოლი).