ერა სრულდება - ბუსკეტსის შემდეგ, ბარსელონას დატოვება კიდევ ერთმა ვეტერანმა გადაწყვიტა

ფაბრიციო რომანო სოციალურ ქსელში იტყობინება, რომ კატალონიური კლუბიდან წასვლის გადაწყვეტილება მარცხენა მცველმა, ჟორდი ალბამ მიიღო.

34 წლის ესპანელს ბარსელონასთან კონტრაქტი 2024 წლის ზაფხულამდე აკავშირებდა, თუმცა მოლაპარაკებების შედეგად, ხელშეკრულება ორმხრივი შეთანხმების საფუძველზე შეწყდება და სეზონის დასრულების შემდეგ, ალბა კატალონიურ გუნდს დატოვებს.

მეტიც, ჟორდიმ უარი თქვა იმ ხელფასზე, რომელიც მას კონტრაქტის გათვალისწინებით ჰქონდა მისაღები - ფეხბურთელს ახალი გამოწვევის მიღება სურს და სულ მალე, კლუბის ძიების საკითხსაც შეუდგება.

შეგახსენებთ, რომ ბარსადან წასვლის გადაწყვეტილება რამდენიმე კვირის წინ სერხიო ბუსკეტსმაც ოფიციალურად დაადასტურა, თუმცა მისი კონტრაქტი ისედაც იწურებოდა და უბრალოდ აღარ გაახანგრძლივა.

ჟორდი ალბა 1998-2005 წლებში ბარსელონას აკადემიაში იზრდებოდა და შემდეგ, გუნდში 2012 წელს ვალენსიადან დაბრუნდა.