ერიკ ტენ ჰაგი მანჩესტერ იუნაიტედში რჩება

"წითელი ეშმაკების" ხელმძღვანელებმა ნიდერლანდელ სპეციალისტთან ახალი კონტრაქტის თაობაზე მოლაპარაკებები უკვე დაიწყეს. მხარეებს შორის პოზიტიური საუბრები მიმდინარეობს და, შესაძლოა, შეთანხმება ახალი სეზონის დაწყებამდე შედგეს.

ტენ ჰაგი "ოლდ ტრაფორდზე" დარჩენითა და ახალ ხელმძღვანელობასთან მუშაობით ბედნიერია, რადგან გრძნობს, რომ კლუბში მას ენდობიან. ერიკის ამჟამინდელი ხელშეკრულება მომავალ ზაფხულში იწურება.

მიუხედავად იმისა, რომ მანჩესტერმა გადაწყვეტილების მიღება გაწელა, ტენ ჰაგს არანაირი პრობლემა არ აქვს და გუნდის პროექტზეა ფოკუსირებული. ინგლისური გრანდის ასეთ არჩევანში მთავარი ფაქტორი ისაა, რომ ნიდერლანდელ მწვრთნელს ახალგაზრდების (მაგ.: კობი მეინუსა და ალეხანდრო გარნაჩოს) განვითარებაში დიდი როლი აქვს.

იუნაიტედი პრესეზონს ივლისში დაიწყებს. ტენ ჰაგის გუნდი პირველ ამხანაგურ მატჩს 15 ივლისს, ნორვეგიის ქალაქ ტრონჰეიმში, რუსენბორგის წინააღმდეგ გამართავს, შემდეგ კი საზაფხულო ტურნესთვის ამერიკის შეერთებულ შტატებში გაემგზავრება.