ერთა ლიგა: მბაპეს გარეშე დარჩენილი საფრანგეთი ისრაელს მიიღებს, იტალია ბელგიას ესტუმრება

დღეს, ერთა ლიგის 2024/25 წლების სეზონის მე-5 ტური აიღებს სტარტს და არაერთი საინტერესო მატჩი გაიმართება.

განსაკუთრებულ ყურადღებას ბრიუსელში გასამართი შეხვედრა იწვევს, სადაც ბელგიის ნაკრები საკუთარ მოედანზე იტალიას მიიღებს.

ერთა ლიგის A დივიზიონის მეორე ჯგუფს 10 ქულით სწორედ იტალია ლიდერობს, ხოლო ბელგიას 4 ქულა აქვს და მესამე პოზიციაზე იმყოფება.

ნაკრებების წინა დაპირისპირება, რომელიც რომში გაიმართა უხვგოლიანი გამოდგა და ფრედ, 2-2 დასრულდა. აღსანიშნავია, რომ იმ მატჩში იტალიას ორბურთიანი უპირატესობა ჰქონდა, თუმცა, 38-ე წუთზე 10 კაცით დარჩა და ბელგიამ გაათანაბრა.

ჯგუფის მეორე შეხვედრა პარიზში ჩატარდება და კილიან მბაპეს გარეშე დარჩენილი საფრანგეთი ისრაელს მიიღებს. დეშამის გუნდს 9 ქულა აქვს, მეორე ადგილზე იმყოფება და იტალიას 1 ქულით ჩამორჩება. ბოლო ტურში სწორედ საფრანგეთ და იტალია დაუპირისპირდებიან ერთმანეთს.

B დივიზიონის საინტერესო მატჩი გაიმართება ათენში, სადაც მეორე ჯგუფის ლიდერი, საბერძნეთი ინგლისს უმასპინძლებს და ფრის შემთხვევაში A დივიზიონის საგზურს გაინაღდებს. აღსანიშნავია, რომ ბერძნებს ოთხივე მატჩი აქვთ მოგებული და ინგლისი გასვლაზე 2-1 დაამარცხეს.

ერთა ლიგა, დღევანდელი მატჩების განრიგი:

A დივიზიონი:
ბელგია V იტალია (23:45)
საფრანგეთი V ისრაელი (23:45)

B დივიზიონი:
ყაზახეთი V ავსტრია (19:00)
საბერძნეთი V ინგლისი (23:45)
ირლანდია V ფინეთი (23:45)
სლოვენია V ნორვეგია (23:45)

C დივიზიონი:
სომხეთი V ფარერის კუნძულები (21:00)
ჩრდილოეთ მაკედონია V ლატვია (23:45)