"ეს ხალხი არ წარმოადგენს ჩვენს კლუბს", - გვარდიოლამ სიტის გულშემატკივართა საქციელი დაგმო
"მანჩესტერ სიტის" გულშემატკივრებმა 1989 წელს მომხდარი "ჰილსბოროს ტრაგედიისადმი" მიძღვნილი ცერემონია ჩაშალეს.
ინგლისის თასის ნახევარფინალში "ლივერპულთან" (2:3) "უემბლიზე" გამართულ მატჩამდე, 33 წლის წინ სტადიონ "ჰილსბოროზე" მომხდარი ჭყლეტვის შედეგად დაღუპულთა ხსოვნის საპატივსაცემოდ წუთიერი დუმილი გამოცხადდა.
"სიტის" ზოგიერთი ფანის ხმაურისა და შეძახილის გამო, შეხვედრის მთავარი არბიტრი, მაიკლ ოლივერი იძულებული გახდა წუთიერი დუმილი შეეწყვიტა.
აღნიშნულ ინციდენტზე "მანჩესტერ სიტიმ" განცხადება გააკეთა: "კლუბის ზოგიერთი გულშემატკივრის საქციელით ძალზედ იმედგაცრუებულები ვართ და ბოდიშს ვუხდით ყველა იმ ადამიანს, ვინც "ლივერპულთანაა" კავშირში".
"ქალაქელთა" მთავარი მწვრთნელი, პეპ გვარდიოლაც გამოეხმაურა მომხდარს: "ეს ადამიანები ჩვენი წარმომადგენლები არ არიან. კლუბის განცხადებას სრულად ვუჭერ მხარს".
