"ესპანელი მ*ძრეველები", - ზალცბურგის გასახდელში ზეიმისას სევილიას ფეხბურთელებს შეურაცხყოფა მიაყენეს
"ზალცბურგი" ჩემპიონთა ლიგის ჯგუფური ეტაპის მე-6 ტურში "სევილიასთან" (1:0) მოგებული მატჩის შემდეგ ზეიმისას სკანდალში გაეხვა.
მოგეხსენებათ, ესპანური კლუბის დამარცხებამ ავსტრიელებს ევროპის მთავარი საკლუბო ტურნირის ფლეი ოფის საგზური მოუტანა.
ინტერნეტსივრცეში გავრცელდა ვიდეო, სადაც ისმის, თუ როგორ უწოდებს "ზალცბურგის" ერთ-ერთი ფეხბურთელი ან პერსონალის წევრი გერმანულ ენაზე "სევილიას" ფეხბურთელებს "ესპანელ მნ*რეველებს".
ზეიმის დროს ინსტაგრამზე პირდაპირი ჩართვა ჰქონდა ნახევარმცველ ნოა ოკაფორს, აღნიშნულ დაპირისპირებაში გასული ერთადერთი გოლის ავტორს.
მას შემდეგ, რაც ვიდეოჩანაწერი თვითერის სხვადასხვა ექაუნთებსა და მედიაში გამოქვეყნდა, "ზალცბურგმა" ბოდიში მოიხადა.
"ჩემპიონთა ლიგის ფლეი ოფში გასვლის გამო გახარებულ გულზე წარმოითქვა სიტყვები, რომლებიც არ უნდა თქმულიყო. დღეს ძლიერი და სამართლიანი მეტოქის წინააღმდეგ ვითამაშეთ, გვაპატიეთ ასეთი სიტყვებისთვის", - წერს ავსტრიული კლუბი თვითერზე.
აგრეთვე, "ზალცბურგმა" ესპანურ კლუბს ინგლისურენოვანი ექაუნთითაც მიმართა: "მადლობა თამაშისთვის, "სევილია"! სასიამოვნო იყო მორიგი ბრძოლა ასეთ ხარისხიან გუნდთან! ყველაფერ საუკეთესოს გისურვებთ!".
აღსანიშნავია, რომ "სევილიას" არც შეურაცხყოფაზე მოუხდენია რეაგირება და არც ბოდიშზე.
