ესპანეთი ევროპის ჩემპიონია!

47-ე წუთზე ლამინ იამალის პასით ნიკო უილიამსმა "ფურია როხა" დააწინაურა. გოლის შემდეგაც ესპანელები დიდ უპირატესობას ფლობდნენ, მაგრამ 73-ე წუთზე "სამმა ლომმა" კოულ პალმერის დარტყმით ანგარიში გაათანაბრა. მიუხედავად ამისა, ლუის დე ლა ფუენტეს შეგირდებმა საქმე დამატებით ტაიმებამდე არ მიიყვანეს: 86-ე წუთზე მარკ კუკურელიას დაბალ პასს საჯარიმოში მიკელ ოიარსაბალმა ფეხი დაუხვედრა, ჯორდან პიკფორდის კარი აიღო და თავის გუნდს მოაგებინა. 

შედეგად, ესპანეთი ევროპის ჩემპიონი ისტორიაში მეოთხედ გახდა, რაც აბსოლუტური რეკორდია. აქამდე პირველ ადგილს, 3-3 ჩემპიონობით, ესპანელები გერმანელებთან იყოფდნენ, ახლა კი ერთპიროვნული ლიდერები არიან.

ესპანელებმა ევროპის ჩემპიონობისკენ მიმავალ გზაზე ხორვატია (3-0), იტალია (1-0), ალბანეთი (1-0), საქართველო (4-1), გერმანია (2-1), საფრანგეთი (2-1) და ინგლისი (2-1) დაამარცხეს.

აღსანიშნავია, რომ ლამინ იამალი ყველაზე ახალგაზრდა ფეხბურთელია, ვისაც ევროპის ჩემპიონატის ფინალში უთამაშია და, შესაბამისად, მოუგია. ამასთან, ის ევრო 2024-ის საუკეთესო ახალგაზრდა ფეხბურთელად დასახელდა, ტურნირის საუკეთესო მოთამაშე კი როდრი გახდა.

ინგლისმა ევროპის ჩემპიონატის ფინალი ზედიზედ მეორედ წააგო.