ფლორენციული გრანდის აღზევება

ზაფხულში როკო კომისომ ფინანსები არ დაიშურა და პალადინოს საჭირო ფეხბურთელები მიუყვანა, გუნდი მოიზე კინით, ედოარდო ბოვეთი და დავიდ დე ხეათი გაძლიერდა, ეს სამი მოთამაშე ნამდვილად ბრწყინავს ფლორენციაში. დე ხეა ყველას უმტკიცებს თავის ოსტატობას და არწმუნებს კრიტიკოსებს, რომ ისინი ცდებოდნენ მის შესაძლებლობებში. პალადინომ საოცრად აათამაშა მოიზე კინი, იტალიელი ფრიულიზე საუცხოოდ ათამაშდა და ჩემპიონატის ერთ-ერთი საუკეთესო გოლეადორია, კინმა ამ სეზონში ჩემპიონატში უკვე 9 გოლის გატანა მოახერხა. ფეხბურთელის და გუნდის ათამაშება, რა თქმა უნდა, რაფაელ პალადინოს დამსახურებაა. იტალიელმა თავისი სტილი და ფილოსოფია გენიალურად მოარგო ფრიულის ბინადარს და მრავალი წლის შემდეგ ფლორენციელ ქომაგებს ჩემპიონთა ლიგაზე დაბრუნების შანსი გაუჩინა. 

ფიორენტინას ამ სეზონში მხოლოდ და მხოლოდ 1 მარცხი აქვს, ისიც ჩემპიონატის ფავორიტ ატალანტასთან, გუნდმა ისეთ კლუბებს მოუგო, როგორიც არის მილანი, რომა და ლაციო. პალადინო ღიად აღიარებს, რომ მისი შთამაგონებელი პეპ გვარდიოლაა და ის ცდილობს ტიკი-ტაკის იტალიური ვერსიის შემოთავაზებას, რა თქმა უნდა, სწორი და ორგანიზებული დაცვით. ასევე უნდა ვახსენოთ ჯანპიერო გასპერინი, რომელთანაც პალადინო ფეხბურთელობის დროს მუშაობდა და იტალიელმა სპეციალისტმა საკმაოდ დიდი გავლენა მოახდინა პალადინოს სათამაშო სტილზე. 

ფიორენტინას ამ წუთისთვის 28 აღებული ქულა აქვს და ცხრილში მეოთხე პოზიციაზე იმყოფება. “იები“ ლიდერ ნაპოლის მხოლოდ 4 ქულით ჩამორჩებიან და მათ ქომაგებს ნამდვილად აქვთ ჩემპიონობაზე ოცნების უფლება. წინ კიდევ ბევრი მატჩია და რთული სათქმელია თუ სად დაასრულებს სეზონს ფლორენციული გრანდი. ისიც უნდა გავითვალისწინოთ, რომ გუშინდელი შეხვედრა ინტერთან გადაიდო და სამომავლოდ “იებს“ საკმაოდ კომფორტული კალენდარი აქვთ.