გარიგება უახლოეს დღეებში დაიხურება — რენატუ სანჩეშმა მილანსა და პსჟ-ს შორის არჩევანი გააკეთა
დიდი ალბათობით, "ლილის" ნახევარმცველი, რენატუ სანჩეში მიმდინარე ზაფხულის სატრანსფერო ფანჯარაზე "პსჟ"-ში გადავა.
როგორც პორტუგალიური გამოცემა Record-ი იტყობინება, 24 წლის ფეხბურთელის ტრანსფერი შეთანხმებულია და ოფიციალურად უახლოეს დღეებში დადასტურდება.
ფრანგული RMC Sport-ის ცნობით, სანჩეშს კრისტოფ გალტიეს გუნდში სურს გადასვლა. მხარეებს შორის მოლაპარაკებები კარგად მიმდინარეობს.
მიუხედავად "მილანის" მხრიდან არსებული ინტერესისა, რენატუ, რომელსაც "ლილთან" მოქმედი კონტრაქტის ვადა 2023 წლის ზაფხულამდე აკავშირებს, "პსჟ"-ს ანიჭებს უპირატესობას.
სანჩეშის აგენტი ჟორჟე მენდეშია. ამ ზაფხულს მისი ერთი კლიენტი საფრანგეთის დედაქალაქში უკვე გადაბარგდა - ვიტინია, ვის სანაცვლოდაც პარიზელებმა 40 მილიონი ევრო გადაიხადეს.
აღსანიშნავია, რომ რენატუ "ლილში" 2019 წლის ზაფხულში "ბაიერნიდან" გადაბარგდა. 2021 წელს პორტუგალიელმა ლიგა 1 მოიგო, მაშინ მას "პსჟ"-ს ახალი დამრიგებელი, გალტიე წვრთნიდა.
გასულ სეზონში სანჩეშმა ყველა ტურნირზე ერთად "ლილის" ღირსება 31 მატჩში დაიცვა, 2 გოლი გაიტანა და 5 შედეგიანი პასიც მიითვალა.
რენატუ სანჩეშის ულამაზესი გასროლა საფრანგეთის ჩემპიონატის მატჩში
