გოლების წვიმა, მბაპეს დუბლი და სენსაცია ლისაბონში — ჩემპიონთა ლიგა ხურდება

ფეხბურთის ქართველი გულშემატკივრისთვის ყველაზე დიდ ინტერესს ლონდონში გამართული მატჩი იწვევდა, სადაც გიორგი მიქაუტაძის ვილაირეალი ტოტენჰემს ესტუმრა და დებიუტში მეკარის შეცდომის გამო გაშვებული გოლით 0-1 დამარცხდა. 24 წლის ქართველმა შემტევმა სრულად ითამაშა 6,8 ქულიანი შეფასება დაიმსახურა.

ტურნირის ერთ-ერთმა მთავარმა ფავორიტმა, მადრიდის რეალმა სანტიაგო ბერნაბეუზე მარსელი მიიღო და მეტოქე დაძაბულ ბრძოლაში, 2-1 დაამარცხა. აღნიშნულ მატჩში ანგარიში 22-ე წუთზე ვეამ გახსნა და სტუმრები დააწინაურა, რასაც 7 წუთში მბაპეს ზუსტად შესრულებული თერთმეტმეტრიანი დარტყმა მოჰყვა. 72-ე წუთზე, მსაჯმა მოედნიდან კარვახალი გააძევა და სამეფო კლუბი 10 კაცით დარჩა. რიცხობრივი უმცირესობის მიუხედავად, 81-ე წუთზე მბაპემ მეორე თერთმეტმეტრიანი გაიტანა და ჩაბი ალონსოს გუნდმა 3 ქულა მოიპოვა.

სენსაციური შედეგი დაფიქსირდა ლისაბონში, სადაც ბენფიკამ ყარაბაღს უმასპინძლა და უხვგოლიან შეხვედრაში 2-3 დამარცხდა. მატჩი მასპინძლებმა კარგად დაიწყეს და მე-16 წუთისთვის ორბურთიან უპირატესობას ფლობდნენ. აზერბაიჯანულმა კლუბმა სენსაცია შემოგვთავაზა, მეტოქეს სამი უპასუხო გოლი გაუტანა და ჩემპიონთა ლიგის ახალი სეზონი გამარჯვებით დაიწყო.

სათამაშო დღის ყველაზე დრამატული დაპირისპირება კი ტურინში შედგა და გულშემატკივარმა 8 გატანილი გოლი იხილა. იუვენტუსმა საკუთარ კედლებში დორტმუნდი მიიღო და გუნდებმა მატჩი 4-4 დაასრულეს. აღსანიშნავია, რომ გერმანელები 94-ე წუთამდე 4-2 იგებდნენ, თუმცა, მსაჯის მიერ კომპენსირებულ მე-4 და მე-6 წუთებზე ვლაჰოვიჩმა და კელიმ გამოიჩინეს თავი და იუვენტუსს 1 ქულა მოუპოვეს.