ავტორიზაცია
ჰანსი ფლიკი მატჩის წინ: ბაიერნის დამარცხება გვსურს
ბარსელონას მთავარმა მწვრთნელმა, ჰანსი ფლიკმა, ჩემპიონთა ლიგაზე ბაიერნთან გასამართ მატჩამდე, პრესკონფერენცია გამართა.
"ბაიერნის წინააღმდეგ სათამაშოდ მზად ვართ. მატჩი, შესაძლოა, განსხვავებული სცენარებით განვითარდეს და ბევრი რამ მოხდეს. ამ სეზონში ყველა შეხვედრაზე ფოკუსირებულნი ვართ. ბაიერნი შესანიშნავი გუნდია. ყველას სურს, საკუთარი თავი საუკეთესოების წინააღმდეგ გამოცადოს.
წარსულში რაც მოხდა, ვერ შევცვლით, გავლენის მოხდენა მხოლოდ დღევანდელ მატჩზე შეგვიძლია. რა თქმა უნდა, მოგება გვსურს. სათამაშო სტილს არ შევცვლით. მეტოქე უნდა დავაპრესინგოთ და შეცდომები არ დავუშვათ.
ყოველი თამაშის წინ მოწინააღმდეგეს კარგად ვსწავლობთ. ბაიერნში მითამაშია და გამიწვრთნია. ეს დიდებული კლუბია, რომელთანაც არაერთი მოგონება მაკავშირებს, მაგრამ ახლა ჩემს ცხოვრებაში ახალი ეტაპია. ბარსელონაში თავს შესანიშნავად ვგრძნობ და ქომაგები მხარს მიჭერენ - ეს ყველაფერი ბრწყინვალეა და მიბიძგებს, რომ მათთვის მაქსიმუმი გავიღო. გვინდა, სრულ მზადყოფნაში ვიყოთ.
ჩვენს გეგმებზე ბევრს არ ვისაუბრებ, რადგან ამაზე მეტოქემ არ შეიტყოს. აშკარაა, გუნდმა რა უნდა გააკეთოს. ყველაფერი სრულყოფილი არ იქნება, მაგრამ ყოველ მატჩში პროგრესს ვცდილობთ. პრესინგი მნიშვნელოვანი იქნება, ისევე, როგორც დაცვა, როცა საჭირო გახდება.
ყოველთვის აწმყოთი ვცხოვრობთ. გუნდში ერთიანობაა. ვფიქრობ, ლა მასიას ფეხბურთელთა დამოკიდებულებაზე დიდი გავლენა აქვს. ისინი ერთმანეთზე ზრუნავენ. როცა გავის მოედანზე შესვლის მომენტი მახსენდება, მბურძგლავს. ეს ყველაფერი ამ გუნდზე ბევრს ამბობს.
ბაიერნს ყოველთვის დომინანტური სტილი აქვს. ისინი პრესინგს მიმართავენ. ეს "რეკორდმაისტერის" დნმ გახლავთ.
თითოეულ მატჩს საკუთარი მოთხოვნები აქვს და ყველა განსხვავებულად ემზადება. ფეხბურთელებს შევხვდით, ვესაუბრეთ... ეს მარტივი არაა, რადგან ბევრი დრო არ გვაქვს.
აქ ძალიან ბედნიერი ვარ. ბარსელონაში მუშაობა ძალიან სასიამოვნოა. ჩემი ვალდებულებაა, რომ მაქსიმალურად დავიხარჯო. მუდმივად განვითარებაზე ვზრუნავთ," - აცხადებს გერმანელი.
ბარსელონა და ბაიერნი ერთმანეთს დღეს, 23:00 საათზე, მონჟუიკზე დაუპირისპირდებიან.
