იოშკო გვარდიოლი: ჩემს შეცდომაზე ჯერ კიდევ გაბრაზებული ვარ, რევანში მსურს

მანჩესტერ სიტის მცველს, იოშკო გვარდიოლს მომდევნო თვეში მანჩესტერ იუნაიტედისთვის რევანშის აღება სურს, რადგან გასული FA თასის ფინალში საკუთარი შეცდომა ჯერ კიდევ ახსოვს.

უემლიბზე გამართულ შეხვედრაში ხორვატი მცველისა და მეკარე შტეფან ორტეგას შეუთანხმებელ მოქმედებას "წითელი ეშმაკების" პირველი გოლი მოჰყვა. საბოლოოდ, პეპ გვარდიოლას შეგირდებმა 1-2 წააგეს.

"ამ მომენტზე ჯერ კიდევ გაბრაზებული ვარ... მინდოდა, შტეფანისთვის ბურთის უკან დამებრუნებინა. ის არ დამინახავს და მეგონა, კარში იდგა. უბრალოდ, ბურთის თავით დაგდებას ვაპირებდი.

მინდა, იუნაიტედის წინააღმდეგ რევანში ავიღო და ქომიუნითი შილდი მოვიგო, რათა ვაჩვენოთ, რომ ახალი სეზონისთვის მზად ვართ. თუ ამ მატჩს მოვიგებთ, მოტივაცია მოგვემატება," - თქვა იოშკო გვარდიოლმა.

მანჩესტერ სიტი და მანჩესტერ იუნაიტედი ქომიუნითი შილდის ფინალში ერთმანეთს 10 აგვისტოს, 18:00 საათზე დაუპირისპირდებიან.