ავტორიზაცია
იტალიამ პარკ დე პრენსზე საფრანგეთი 3-1 დაამარცხა
ერთა ლიგაზე, A ლიგის პირველ ტურში საფრანგეთი საკუთარ მოედანზე, პარიზში იტალიასთან 1-3 დამარცხდა.
პარკ დე პრენსზე ანგარიში მე-13 წამზე გაიხსნა - იტალიელთა შეცდომით ბრედლი ბარკოლამ ისარგებლა და "მამლების" ისტორიაში ყველაზე სწრაფი გოლი გაიტანა.
ცივი შხაპის მიუხედავად, ლუჩანო სპალეტის შეგირდებმა სიტუაცია შემოატრიალეს. 30-ე წუთზე, სანდრო ტონალისთან გათამაშებული შესანიშნავი კომბინაციის შემდეგ, ფედერიკო დიმარკომ ერთი შეხებით დიდებული გოლი გაიტანა და წონასწორობა აღადგინა.
მეორე ტაიმის საწყის წუთებზე, დაცვაში შეცდომა ფრანგებმაც დაუშვეს, რითაც იტალიამ ისარგებლა და დავიდე ფრატეზის (51') გოლით წინ გავიდა. დიდიე დეშამის გუნდმა დაცვაში არეულობა კვლავ გააგრძელა და 74-ე წუთზე ჯაკომო რასპადორიმ საბოლოო წერტილი დასვა: 3-1.
ჯგუფის მეორე მატჩში ბელგიამ ისრაელს იდენტური ანგარიშით (3-1) მოუგო და იტალიასთან პირველ ადგილს იყოფს.
საფრანგეთი მომდევნო ტურში ბელგიას დაუპირისპირდება, იტალია კი - ისრაელს. ორივე შეხვედრა 9 სექტემბერს, 22:45 საათზე გაიმართება.
