ავტორიზაცია

იტალიური რენესანსი - ანუ ფსკერიდან მწვერვალამდე სულ რაღაც 3 წელიწადში

იტალიური რენესანსი - ანუ ფსკერიდან მწვერვალამდე სულ რაღაც 3 წელიწადში
თარიღი 12 ივლ 2021, 19:38

იტალია დაბრუნდა და ისეთი შთაბეჭდილება იქმნება, თითქოს არასდროს, არსად წასულა.

ევროპის ჩემპიონატის მოგება „უემბლიზე“, მასპინძელი ინგლისის წინააღმდეგ, კიდევ ერთხელ ამტკიცებს, რომ „სკუადრა აძურა“ ფეხბურთის მწვერვალზე დაბრუნდა და ხაზს უსვამს იმას, თუ რამხელა შრომა და ძალისხმევა გაიღო ამ გუნდის აღორძინებისთვის რობერტო მანჩინიმ.

სულ რაღაც სამი წლის წინ, „აძურიმ“ ფსკერას დაუკაკუნა, როცა ჯამპიერო გასპერინის ხელმძღვანელობით, გუნდი 60 წლის შემდეგ პირველად, მსოფლიო ჩემპიონატზე ვერ მოხვდა. თუმცა, ამას დიდი ცვლილებები მოყვა, როგორც მთავარი მწვრთნელის პოსტზე, ისე ფედერაციაშიც.

„ინტერის“ და „მანჩესტერ სიტის“ ყოფილ მთავარ მწვრთნელს ცვლილებების განხორციელებაზე ბევრი არ უფიქრია. მან გუნდი მუშაობის სამ წელიწადში 67 სხვადასხვა ფეხბურთელი გამოიყენა, რომელთაგან 35 - სულაც დებიუტანტი იყო. დებიუტანტებს შორის არის ასეთი სახელებიც: რაფაელ ტოლოი, ემერსონ პალმიერი, ალესანდრო ბასტონი, ნიკოლო ბარელა, მანუელ ლოკატელი და მატეო პესინა - დიახ, ეს ის ფეხბურთელები ჩამოგითვალეთ, რომელთაც დებიუტი მანჩინის დროს ჰქონდათ და მოგებულ ევროზეც ითამაშეს.

მანჩინის დანიშვნიდან სულ რაღაც ოთხ თვეში, გუნდი პორტუგალიასთან დამარცხდა. მას შემდეგ, „სკუადრა აძურა“ უკვე 34 თამაშია წაუგებელია და გუნდის პირადი რეკორდი დაამყარა, რომელიც აქამდე 30 მატჩს ითვლიდა.

ევრო 2020-ს ნახევარფინალში ესპანეთთან ფრედ (1:1) დასრულებულ შეხვედრამდე, იტალიას ზედიზედ მოპოვებული გამარჯვებების დიდებული სერიაც ჰქონდა, რომელიც 13 მატჩზე შეწყდა. იტალია და ბელგია იყვნენ ერთადერთი გუნდები ევროპის ჩემპიონატის საკვალიფიკაციო ეტაპზე, რომლებმაც 10-დან 10-ვე მატჩი მოიგეს. იტალიამ, ყველაფერთან ერთად, მხოლოდ 4 გოლი გაუშვ.

იტალიამ ევრო 2020-ს პირველივე მატჩში საუცხოო შთაბეჭდილება დატოვა და ხალხის გული მოიგო. ბევრს მათში ეჭვი ეპარებოდა, ამბობდნენ, რომ გუნდი ძლიერებთან ვერაფერს გახდებოდა, მაგრამ რაც უფრო ხაზგასასმელია, იტალია ბადის რთულ ნაწილში მოხვდა და ისეთი გუნდების გამოგდება მოუწია, როგორებიც ბელგია და ესპანეთი არიან.

ბევრი მათგან ნახევარფინალშიც არ ელოდა გასვლას, ისინი კი უფრო შორს წავიდნენ და მიჯრით ჯერ ბელგიის, შემდეგ ესპანეთის და ბოლოს, ინგლისის დამარცხებით, ევროპის კონტინენტზეც გამეფდნენ.