ჯუდ ბელინგემი, შესაძლოა, რეალს 2 თვით დააკლდეს

Cadena SER-ის ჟურნალისტის, ფრანსისკო ხოსე დელგადოს ინფორმაციით, ჯუდ ბელინგემმა, შესაძლოა, ივლისიდან ოქტომბრამდე ვერ ითამაშოს.

წყაროს ცნობით, ეს იმ შემთხვევაში მოხდება, თუ ევროპის ჩემპიონატის შემდეგ ინგლისელი ფეხბურთელი მხრის ოპერაციის ჩატარებას გადაწყვეტს.

ბელინგემი ნოემბრიდან მოყოლებული დისკომფორტით თამაშობს, სეზონის დასკვნით ნაწილში კი ტკივილი სულ უფრო და უფრო ინტენსიური ხდებოდა. თუ კონსერვატიული მკურნალობა შედეგს არ გამოიღებს და სიტუაცია გამწვავდება, ჯუდი და მისი გარემოცვა ქირურგიულ ჩარევას გადაწყვეტს, რათა მდგომარეობა მეტად არ გაუარესდეს.

თუ ასე მოხდება, რეაბილიტაციას დაახლოებით 3 თვე დასჭირდება. ამასთან, თუ ინგლისი ევრო 2024-ის ფინალში გავა და ბელინგემი ოპერაციას გაიკეთებს, მან, შესაძლოა, ოქტომბრამდე იუქმოს, რაც ნიშნავს, რომ ახალ სეზონში ფეხბურთელი მადრიდის რეალს 2 თვით დააკლდება.

ინგლისელმა რეალის მაისურით, სადებიუტო სეზონში 23 გოლი გაიტანა და 13 ასისტი მიითვალა.