ავტორიზაცია
კაილ უოკერი მილანის ფეხბურთელია — გამოსამშვიდობებელი წერილი სიტის
მილანმა დაადასტურა, რომ კაილ უოკერი გუნდის ახალი შენაძენია. ინგლისელი "როსონერის" იჯარით შეუერთდა. სურვილის შემთხვევაში, იტალიურ კლუბს მისი გამოსყიდვაც შეეძლება.
უოკერი სიტის თითქმის 8-წლიანი პერიოდის შემდეგ ემშვიდობება და გუნდს გამოსამშვიდობებელი წერილიც დაუტოვა:
"მანჩესტერ სიტი... საიდან დავიწყო? 2017 წელს, ამ კლუბში გადასვლით ოცნება ავიხდინე. 7 წლის შემდეგ, ერთად 17 ტიტული მოვიგეთ, მათ შორის - ჩემპიონთა ლიგა და ცნობილი ტრებლი, რასაც ბავშვობაში მხოლოდ ოცნებებში თუ წარმოვიდგენდი.
დიდებული ფეხბურთელების გვერდით თამაშმა საკუთარი თავის საუკეთესო ვერსიად მაქცია. მადლიერი ვარ იმ შესაძლებლობით, რომელიც ეტიჰადზე მომეცა.
დიდი მადლობა ყველას - სამწვრთნელო შტაბს, გასახდელში მომუშავე ადამიანებსა და კიდევ ბევრს, ვინც სცენებს მიღმა მუშაობდა. თქვენ ყოველი დღე სასიამოვნოდ აქციეთ და ყველანაირი პირობა შეგვიქმენით, რომ საუკეთესოდ გვეთამაშა.
მადლობა თანაგუნდელებს იმ მომენტისთვის, რომელიც გასახდელ ოთახში შესვლისთანავე განვიცადე. მადლობა დიდებული მოგონებებისთვის და ყველა იმ წარმატებისთვის, რომელიც გავიზიარეთ. ჩვენ მეგობრები ვართ, ცხოვრების ბოლომდე ჩემი ოჯახი იქნებით.
მადლობა პეპ გვარდიოლას, რომ მენდო და 2017 წელს ჩემი ტრანსფერისთვის ყველაფერი გააკეთა. ერთად 17 ტიტული აღვმართეთ, შენ კი დამეხმარე, რომ ის ფეხბურთელი გავმხდარიყავი, რომელიც ახლა ვარ. სამუდამოდ მადლობელი ვიქნები.
მადლობა ენის, ჩემს შვილებსა და ოჯახს, რომლებიც ამ თავგადასავლის განმავლობაში მხარს მიჭერდნენ.
რაც ყველაზე მთავარია - მადლობა ქომაგებს, რომლებმაც პირველივე დღიდან მიმიღეს. თქვენი ურყევი მხარდაჭერა არასდროს დამავიწყდება.
მომავალში ულევ წარმატებებს გისურვებთ. მადლობა. კაილი."
უოკერმა "ქალაქელთა" მაისურით ამ დროის განმავლობაში 319 მატჩი ჩაატარა, 6 გოლი გაიტანა და 23 ასისტი მიითვალა, ახლა კი ის ახალი გამოწვევებისთვის ემზადება.
