ხედირა: "ცუდი გაგებით არ ვამბობ, მაგრამ რონალდუს იუვენტუსზე უფრო დიდი გავლენა ჰქონდა, ვიდრე რეალზე"
"რეალისა" და "იუვენტუსის" ყოფილმა ნახევარმცველმა, სამი ხედირამ "მანჩესტერ იუნაიტედის" თავდამსხმელის, კრიშტიანუ რონალდუს შესახებ ისაუბრა.
მოგეხსენებათ, 34 წლის გერმანელი, რომელიც ამჟამად "შტუტგარტის" ღირსებას იცავს, პორტუგალიელ სუპერვარსკვლავთან ერთად ჯერ მადრიდში თამაშობდა, შემდეგ კი ტურინში.
"ორ სხვადასხვა რონალდუს შევხვედრილვარ. "რეალში" ცოტა ახალგაზრდა, ემოციური და ეგოისტი იყო. ცუდი გაგებით არ ვამბობ, მაგრამ საკუთარ თავში გარკვევა სჭირდებოდა", - ციტირებს ხედირას სიტყვებს AS-ი.
"რონალდუ ბევრს, ძალიან ბევრ გოლს იტანდა და წარმოუდგენელი იყო, მაგრამ გუნდზე ძლიერ გავლენას არ ახდენდა. კრიშტიანუს მეორედ "იუვენტუსში" შევხვდი. გუნდში იგივე ეგოიზმით მოვიდა, გოლების გატანა უნდოდა, მაგრამ უფრო ლიდერად იქცა".
გერმანელის განცხადებით, რონალდუ თანაგუნდელებს მუდმივად მუხტავდა და იცოდა, რომ ტიტულების მოსაგებად მათი მხარდაჭერა იყო საჭირო.
"რეალში" რონალდუ ყოველთვის გუნდის ნაწილი იყო, მაგრამ "იუვენტუსში" ლიდერად იქცა. კრიშტიანუ თამაშზე ყოველთვის კონცენტრირებული გახლდათ, თუმცა, როცა შვილები შეეძინა, მოდუნდა. ისეთი კონკურენტული სულისკვეთება აქვს... ვარჯიშებზე ყველას უნდოდა მისი დამარცხება და როცა მის გუნდში აღმოჩნდებოდნენ, ყველას სურდა მას გამარჯვებაში დახმარებოდა", - დასძინა ხედირამ.
