ხვიჩა კვარაცხელია UEFA-სთან ინტერვიუში: ჩვენი მიზანი ჯგუფური ეტაპის დაძლევაა

საქართველოს ნაკრების ევროზე გასვლაზე: "ასეთ მნიშვნელოვან ტურნირზე მონაწილეობა თითოეული ქართველის ოცნება იყო. როცა ამას მივაღწიეთ, ყველას ცხოვრებაში უბედნიერესი დღე გვქონდა. მაგრამ აქ უბრალოდ ტურისტებად არ ჩამოვსულვართ: გვსურს, ევრო 2024-ზე საკუთარი კვალი დავტოვოთ და ისტორიის ახალი გვერდი დავწეროთ - ამისთვის ყველაფერს გავიღებთ. ჩვენი გუნდი ძალიან ფოკუსირებულია და მზად არის. საქართველოში ყველა ჩვენს დებიუტს ელოდება. ვფიქრობ, 18 ივნისს საქართველო გაერთიანებული იქნება და მოგებას შევეცდებით."

გუნდის ლიდერობაზე: "ეს დიდი პასუხისმგებლობაა. ბედნიერი ვარ, როცა ჩემი საქმე დაფასებულია. ბევრ ქართველ ფეხბურთელს შეუძლია, რომ ქვეყნის საუკეთესო მოთამაშე გახდეს. ყველანი ვცდილობთ, რომ ერთიანი გუნდი ვიყოთ, რადგან ინდივიდუალური წარმატება ამ მომენტში ჩვენთვის ნაკლებად მნიშვნელოვანია. ძალიან კონცენტრირებულნი ვართ და წარმატებისთვის მაქსიმუმს გავიღებთ. ჩემთვის ევროპის ჩემპიონატზე თამაში დიდი სიამოვნებაა. ეს დაუჯერებელი მომენტები და ემოციები ჩვენს ცხოვრებაში სამუდამოდ დარჩება."

საქართველოს ნაკრების შემადგენლობაზე: "გუნდში გამოცდილი და ახალგაზრდა ფეხბურთელების კომბინაციაა. ერთმანეთს კარგად შევეწყვეთ და ჩამოვაყალიბეთ გუნდი, რომელსაც ყველასთან ბრძოლა შეუძლია. გურამ კაშია ნაკრების თითოეული წევრისთვის სამაგალითო პიროვნებაა - ის გამოცდილია და ყოველდღე ვარჯიშობს. გურამი ახალგაზრდა ფეხბურთელებს მაგალითს აძლევს, რომ გულმოდგინედ იშრომონ. იგი ნამდვილი კაპიტანია და მისთვის მხოლოდ მადლობის თქმა შეგვიძლია. კაშია გვლიდერობს და ყველაფერს აკეთებს, რაც ნამდვილმა კაპიტანმა მოედანზე და მის მიღმა უნდა გააკეთოს."

მიზნებზე: "მზადება მაქსიმალურად ინტენსიურ რეჟიმში მიმდინარეობს. ჩვენს ოცნებამდე ბევრი აღარ დარჩა - ევროზე საქართველოს პირველი მატჩი ახლოვდება და ემოციებით დატვირთულნი ვართ, მაგრამ, ვცდილობთ, თავი გავაკონტროლოთ. სადებიუტო შეხვედრისთვის საუკეთესოდ ვემზადებით, რაც ყველაზე მნიშვნელოვანია, რადგან შემდეგ მატჩებს ისეთივე ხასიათით შევხვდებით, როგორითაც პირველს დავიწყებთ. ჩვენი პირველი მიზანი, როგორც ალბათ ყველა გუნდისთვის, ჯგუფური ეტაპის დაძლევაა - ამისთვის ყველაფერს გავაკეთებთ. ვიმედოვნებ, ყველაფერი ჩვენს სასარგებლოდ მოხდება და მიზანს მივაღწევთ."

საქართველოს ნაკრები ევროპის ჩემპიონატზე პირველ მატჩს 18 ივნისს, დორტმუნდში, "სიგნალ იდუნა პარკზე" თურქეთის წინააღმდეგ გამართავს. ამის შემდეგ, 22 ივნისს, ჰამბურგში, "ფოლკსპარკშტადიონზე" ვილი სანიოლის გუნდი ჩეხეთს შეხვდება, 4 დღის შემდეგ კი გელზენკირხენში, "ფელტინს-არენაზე" პორტუგალიას დაუპირისპირდება.