კილიან მბაპეს მომენტი ახლოვდება - არსებობს რისკი, რომ ფრანგი რეალ მადრიდს დაასუსტებს?

კილიან მბაპემ ოცნება მიმდინარე ზაფხულში აისრულა და რეალ მადრიდში გადავიდა, თუმცა არანაირი გარანტია არ არსებობს, რომ ეს თანამშრომლობა წარმატებებით აღსავსე იქნება.

მბაპე ერთ-ერთი უდიდესი ტალანტია, მაგრამ ფაქტია, რომ ფრანგს დიდი ეგო აქვს, რამაც, შესაძლოა, გარკვეული პრობლემები გამოიწვიოს. "ლოს ბლანკოსს" გასულ წელს თითქმის იდეალური სეზონი ჰქონდა, მაგრამ გამორიცხული არაა, აღნიშნულმა ტრანსფერმა სიტუაცია არიოს.

კილიანს რეალ მადრიდში უკვე უნდა ეთამაშა - მან კლუბი უარით ორჯერ გაისტუმრა და ქომაგები გააბრაზა, ამის შემდეგ კი მადრიდულმა კლუბმა ის გააფრთხილა, რომ თეთრ მაისურს ვეღარ მოირგებდა.

მიუხედავად ამისა, მბაპე რეალ მადრიდს მაინც შეუერთდა და გარიგებაც საკმაოდ კარგია - ის სატრანსფერო ბონუსად €150 მილიონს მიიღებს და პლუს - გაუმჟღავნებელ თანხებსაც. მნიშვნელოვანი რამ ისიცაა, რომ მადრიდელებს პარი სენ-ჟერმენისთვის არაფრის გადახდა მოუწევთ.

რეალ მადრიდმა გასულ წელს ჩემპიონთა ლიგა კილიანის გარეშე მოიგო. ფლორენტინო პერესს ფრანგის ტრანსფერის განხორციელება ბევრად ადრე სურდა, მაგრამ იმის ფონზე, რომ გუნდმა ტიტულების მოგება განაგრძო და ტრანსფერებზე დიდი თანხა არ დაუხარჯავს, წუწუნი არ ღირს.

მბაპეს ტრანსფერით აღფრთოვანება, შესაძლოა, დიდხანს არ გაგრძელდეს. თეორიულად, მსოფლიოს საუკეთესო ფეხბურთელის ევროპის ჩემპიონ გუნდში გადასვლა წარმატების გარანტია უნდა იყოს, მაგრამ ფეხბურთში ყველაფერი ყოველთვის ასე არ მუშაობს. კილიანი გოლების გატანის უნარითაა ცნობილი, ასე რომ, რეალ მადრიდმა მასთან ერთად მეტოქეთა კარი უფრო მეტჯერ უნდა აიღოს, მაგრამ პრობლემებიც არსებობს.

"ლოს ბლანკოსს" ფრანგის პოზიციაზე ტოპ ფეხბურთელი უკვე ჰყავს. ვინისიუსს ჟუნიორმა, შესაძლოა, წელს ოქროს ბურთი მოიგოს, რადგან 2023/24 წლების სეზონში ძალიან შთამბეჭდავი იყო. ორივე მოთამაშე მარცხენა ფლანგელია და მარჯვენა ფეხს იყენებს, რაც ნიშნავს, რომ მარცხენა ვინგერის პოზიციაზე ორივე მათგანის ადგილი არაა.

მბაპეს ცენტრშიც უთამაშია და 2022 წლის მსოფლიოს ჩემპიონატზე შესანიშნავი იყო. მადრიდში კილიანი, სავარაუდოდ, სწორედ ცენტრალური თავდამსხმელის პოზიციას დაიკავებს ან, შესაძლოა, ვინისიუსი მარჯვენა ფლანგზე გადაწიონ - იდეალური ვარიანტი არცერთი არაა.

გასულ სეზონში რეალ მადრიდი უბურთოდ მოქმედებისას ძალიან ეფექტური იყო. კარლო ანჩელოტი 4-4-2 სქემას იყენებდა და მეტოქეებს ბურთის გორაობის უფლებას აძლევდა, რასაც დიდი საფრთხე არ მოჰქონდა. მადრიდელთა სტრატეგიას მოწინააღმდეგე გუნდებისთვის, ბურთის ქონის მიუხედავად, მომენტების შექმნის შეზღუდვას წარმოადგენდა.

ვინისიუსს დაცვაში მონაწილეობის მიღებდა დიდად არ ევალებოდა და შეტევაში თავის შანსებს ელოდებოდა. ის ზარმაცი არაა, მაგრამ ბრაზილიელის დაცვითი მოვალეობები შეზღუდული იყო.

თავის მხრივ, მბაპე დაცვაში ჩასვლით დიდად დაინტერესებული არაა, რაც პარი სენ-ჟერმენისთვის პრობლემას წარმოადგენდა, როცა გუნდში ნეიმარი და ლეო მესიც იყვნენ. ამის გამო ცვლილების განხორციელება საფრანგეთის ნაკრების მწვრთნელსაც კი მოუწია - დიდიე დეშამმა ის ცენტრში დააყენა, რადგან გუნდის მარჯვენა ფლანგი ხშირად ძალიან დაუცველი იყო.

ეს ნიშნავს, რომ თუ მბაპეს ვინისიუსის პოზიციაზე გაამწესებენ, რეალ მადრიდს დაცვაში გაუჭირდება. ანჩელოტის გამოსავლის პოვნა მოუწევს.

მბაპე პიროვნულად ყოველთვის ძლიერი იყო და წესიერებით ცნობილი ნამდვილად არაა. პსჟ-ში კილიანის გავლენა იმდენად დიდი იყო, რომ ის კლუბზე მნიშვნელოვანიც კი ჩანდა. იგი პარიზელებს ნებისმიერი რამის გაკეთებას აიძულებდა. ფეხბურთელის მიერ ასეთი გრანდის მართვა აშკარად უცნაური სანახავი იყო.

ფრანგს დავიწყებული აქვს, თუ როგორი გრძნობაა, როცა აკონტროლებენ. ის საფრანგეთის ნაკრების კაპიტანი გახდა, მიუხედავად იმისა, რომ ამისთვის მზად არ იყო, Nike-თან თანამშრომლობა დაიწყო და ნეიმარი გუნდიდან გააგდო. მადრიდში კილიანის ასეთ ქმედებებს არ შეეგუებიან. სხვა გრანდებისგან განსხვავებით, რომლებისთვისაც დიდ მოთამაშეებს პრობლემები შეუქმნიათ, რეალ მადრიდს საკმაო ძალა აქვს, რომ ინდივიდუალურ სუპერვარსკვლავებზე მაღლა იდგეს.

კილიანმა უნდა გაანალიზოს, რომ "ლოს ბლანკოსში" მას გუნდზე მორგება მოუწევს და არა ყურადღების ცენტრში ყოფნა. ტოპ ფეხბურთელებით სავსე კლუბში ფრანგს გუნდურად მუშაობა მართებს და არა მათზე მაღლა ყოფნაზე ფიქრი.

საქმე მხოლოდ ვინისიუსისა და მბაპეს მოედანზე ერთად ყოფნის საკითხი არაა. კილიანის ტრანსფერი გუნდში სხვა მოთამაშეების პოზიციებსა და როლებს შეცვლის. ჯუდ ბელინგემს, რომელიც გასულ სეზონში 10-იანზე ძალიან ეფექტური იყო, სავარაუდოდ, ნახევარდაცვაში უფრო ღრმად თამაში მოუწევს. როდრიგო კი, რომელიც თავს ყველაზე კარგად მარჯვენა ფლანგზე გრძნობს, ალბათ, საერთოდ სათადარიგოთა სკამზე დარჩება ხოლმე.

ანჩელოტის, დიდი ალბათობით, სისტემის შეცვლაც მოუწევს. შესაძლოა, იტალიელმა სპეციალისტმა გუნდი, 4-1-2-1-2-დან, 4-3-3-ზე გადააწყოს. ნებისმიერ შემთხვევაში, ეს ყველაფერი შეტევაში ცვლილებებს გამოიწვევს და სხვა მოთამაშეებზეც იმოქმედებს. მაგალითად, ბელინგემის უკან დაწევის გამო შემადგენლობიდან ერთ-ერთი ნახევარმცველი ამოვარდება.

ანჩელოტის თავის განკარგულებაში ძალიან ბევრი ნიჭიერი ფეხბურთელი ჰყავს. ამდენი დიდებული მოთამაშის ყოლა კარგი პრობლემაა, მაგრამ მათი გაწვრთნაც და ისეთი ატმოსფეროს შექმნა, რომ ყველა ბედნიერი იყოს, დიდი გამოწვევა იქნება ისეთი მწვრთნელისთვისაც კი, როგორიც კარლოა.

იტალიელმა ეს აღნიშნა კიდეც: "ამდენი სუპერვარსკვლავის ყოლამ ჩემი შვებულება გაანადგურა. სულ იმაზე ვფიქრობ, ვინ ვათამაშო."

უდიდესი ვარსკვლავი მსოფლიოში ერთ-ერთ ყველაზე დიდებულ კლუბს შეუერთდა... რეალ მადრიდს მსგავსი ტრანსფერები ადრეც გაუკეთებია და "გალაქტიკოს" დროს ყოველ ზაფხულში დიდ ფეხბურთელს იმატებდა. თუმცა, მაშინ ამან არ იმუშავა და გუნდმა წარმატებებს ვერ მიაღწია. 

ახლა, კილიანთან ერთად, მადრიდელებს, შესაძლოა, იგივე პრობლემა შეექმნათ. სავარაუდოდ, მბაპე ისეთ დრამებს არ დადგამს, როგორც დევიდ ბექჰემი, მაგრამ ის დიდი ვარსკვლავია და, შესაძლოა, სიტუაცია დაიძაბოს. ფურცელზე ყველაფერი დიდებულად ჩანს - ერთ-ერთი საუკეთესო ფეხბურთელი ოცნებას ისრულებს - მაგრამ რეალობაში, შესაძლოა, საქმე ასე იდეალურად არ წავიდეს...

კილიან მბაპეს მადრიდული დებიუტი, დიდი ალბათობით, დღეს შედგება. 23:00 საათზე რეალ მადრიდი UEFA-ს სუპერ თასზე ატალანტას დაუპირისპირდება.