კლაუდიო ბრავო: თუ ბარსელონა დამირეკავს, მზად ვარ, კარიერა განვაახლო

ბარსელონასა და ვილიარეალს შორის გუშინ გამართულ მატჩში (5-1), მარკ-ანდრე ტერ შტეგენმა მძიმე ტრავმა მიიღო, რის გამოც გერმანელისთვის სეზონი დამთავრებულია.

ბარსა, სავარაუდოდ, მეკარეს დაიმატებს. გავრცელებული ცნობებით, კატალონიური კლუბის რადარზე კეილორ ნავასი, ჟორდი მასიპი, ედგარ ბადია, ირჟი პავლენკა, ლორის კარიუსი და ტომაშ ვაცლიკი არიან.

საინტერესოა, რომ ბარსელონას კიდევ ერთი ვარიანტი გამოუჩნდა - "ბლაუგრანას" ყოფილმა მეკარემ, კლაუდიო ბრავოს განაცხადა, რომ მზადაა, ბარსას დაეხმაროს: "თუ ბარსელონა დამირეკავს, მზად ვარ, კარიერა განვაახლო."

41 წლის ჩილელმა საფეხბურთო კარიერა გასული სეზონის დამთავრებისთანავე დაასრულა. მისი ბოლო კლუბი ბეტისი იყო, რომლის რიგებშიც 2023/24 წლების სეზონში 14 მატჩი ჩაატარა, 10 გოლი გაუშვა და კარი მშრალად 5-ჯერ შეინახა. კლაუდიომ კარიერაში ბოლო შეხვედრა 2024 წლის კოპა ამერიკაზე ჩაატარა.

ბარსელონაში ბრავო 2014-2016 წლებში ასპარეზობდა. ხსენებულ პერიოდში, ლა ლიგაში ბარსას კარს სწორედ ჩილელი იცავდა, ჩემპიონთა ლიგაზე კი ტერ შტეგენი თამაშობდა. საბოლოოდ, კატალონიურმა გრანდმა კლაუდიოს გაყიდვა და გერმანელის დატოვება გადაწყვიტა.

ბრავოს გამოცდილებისა და იმის ფონზე, რომ იგი კლუბს უკვე იცნობს, ბარსელონამ, შესაძლოა, მისი დაბრუნების საკითხი ნამდვილად განიხილოს.