კრიშტიანუ რონალდუს ურჩევენ, რომ ირანში არ ჩავიდეს

Varzesh3-ის ინფორმაციით, კრიშტიანუ რონალდუს ურჩევენ, რომ 3 მარტს, აზიის ჩემპიონთა ლიგაზე, ირანული ესტეღლალის წინააღმდეგ გასამართი მატჩისთვის, თეირანში არ ჩავიდეს.

არაბებმა ირანულ კლუბს ოფიციალური წერილი გაუგზავნეს და შეხვედრის ნეიტრალურ ლოკაციაზე ჩატარება სთხოვეს, რაც ირანის ფეხბურთის პრეზიდენტმა მეჰდი ტაჯმა და ესტეღლალის აღმასრულებელმა დირექტორმა ალი ნაზარი ჯუიბარიმ დაადასტურეს.

ჯუიბარიმ აღნიშნა, რომ უსაფრთხოების სამსახურმა პორტუგალიელ ვარსკვლავს თეირანში ჩასვლისგან თავის შეკავებისკენ მოუწოდა, რადგან ირანში ფეხბურთელის წინა ვიზიტი ძალიან სკანდალური გამოდგა და არეულობა გამოიწვია.

ალი ნაზარი იმასაც ამბობს, რომ ვიზები ყველა სტუმარი მოთამაშისთვის გაცემულია, მაგრამ, ჯერჯერობით, უცნობია, ვინ გაემგზავრება თეირანში.

ესტეღლალმა მატჩის სხვაგან გამართვაზე უარი თქვა და დასძინა, რომ შეხვედრის საკუთარ მოედანზე ჩატარების ლეგალური უფლება აქვს. ამის გამო, შესაძლოა, რონალდუ ირანში არ ჩავიდეს და ალ ნასრს ვერ დაეხმაროს.

თუმცა, არაბულ კლუბთან დაახლოებული ჟურნალისტი, აბდულაზიზ ალ ოსიმი ირწმუნება, რომ: "ღვთის ნებით, ლეგენდა გუნდთან ერთად იქნება."

ალ ნასრი და ესტეღლალი ერთმანეთს აზიის ჩემპიონთა ლიგის 1/8-ფინალში დაუპირისპირდებიან. პირველი შეხვედრა სწორედ ირანში გაიმართება, განმეორებითი მატჩი კი - საუდის არაბეთში.