ლა ლიგა 2024/25 | დაწინაურებული გუნდების მდგომარეობა და შანსები

სულ მალე ახალი საფეხბურთო სეზონი იწყება - მსოფლიოში ერთ-ერთი საუკეთესო ჩემპიონატი, ლა ლიგა სტარტს 15 აგვისტოს აიღებს.

პრიმერა დივიზიონში, კვლავინდებურად, 20 გუნდი იასპარეზებს, მათ შორის, 3 დაწინაურებული კლუბი - ვალიადოლიდი, ლეგანესი და ესპანიოლი.

პირველი კლუბი, რომელიც დაწინაურდა, ვალიადოლიდი იყო - კასტილიელებმა მათემატიკურად დაწინაურება ვილიარეალ ბ-სთან 3-2 მოგების შემდეგ გაინაღდეს. საბოლოოდ, მათ სეგუნდაში მე-2 ადგილი დაიკავეს. ახალი სეზონის წინ რონალდო ნაზარიოს მფლობელობაში მყოფმა გუნდმა სტიპე ბიუკი (€4m), ვიქტორ მესეგერი (€3m), რაულ მორო (€2.5m), ამატ ნდიაიე (€2m), ერაი ჯიომერტი (იჯარით) და კიდევ რამდენიმე ფეხბურთელი დაიმატა. ამასთან, მათ რიგებში ჯერ კიდევ ირიცხება კენედი, რომელიც ვალიადოლიდმა 2022 წელს ჩელსიდან შეიძინა. გუნდი მიმდინარე სატრანსფერო ფანჯარაზე მონჩუმ (€3.6m), სერხიო ესკუდერომ (თავისუფალი აგენტი), ჟორდი მასიპმა (თავისუფალი აგენტი) და ალვარო ნეგრედომ (თავისუფალი აგენტი) დატოვეს.

სავარაუდოდ, ვალიადოლიდი სატრანსფერო ფანჯრის ბოლომდე იჯარით კიდევ რამდენიმე ფეხბურთელის აყვანას შეეცდება. ამასთან, გუნდს განათხოვრებული სელიმ ამალა და კიკე გარსია დაუბრუნდა. გასულ სეზონში სეგუნდაში გუნდის საუკეთესო ბომბარდირი მამადუ სილა იყო, მაგრამ მან მხოლოდ 8 გოლი გაიტანა, და კასტილიელები, დიდი ალბათობით, თავდამსხმელის შეძენაზეც იფიქრებენ.

სავარაუდო XI (4-3-3): ფერეირა - როსა, ხავი სანჩესი, ბოიომო, ლუის პერესი - კიკე გარსია, ჯიომერტი, ამალა - მორო, სილა, ამატი

ვერდიქტი: დაწინაურების მიუხედავად, პაულო პეცოლანოს გუნდი დამაჯერებლად ვერ გამოიყურება. სავარუდოდ, მათ რთული სეზონი ექნებათ და, შესაძლოა, კვლავ დაბალ ლიგაში დაქვეითდნენ.

მეორე გუნდი, რომელიც ლა ლიგაში პირდაპირ გადმოვიდა, ლეგანესია, რომელმაც უმაღლესი დივიზიონის საგზური 2024 წლის 2 ივნისს, ელჩესთან მოგებით (2-0) გაინაღდა. მადრიდული გუნდი პრიმერა დივიზიონში 4-წლიანი პაუზის შემდეგ დაბრუნდა და ასევე, უმაღლეს ლიგაში ისტორიაში მეორედ ავიდა.

ლეგანესმა სატურნირო ცხრილის ცხრილის ქვემოდან ტოპ ადგილზე გადასვლით ყველა გააკვირვა. მიუხედავად იმისა, რომ მათ რთული მომენტები მოგვიანებითაც ჰქონდათ, სეგუნდას ჩემპიონები გახდნენ. ახლა კი, 39 წლის მწვრთნელი, ბორხა ხიმენესი მზადაა, თავის გუნდს ახალი გამოწვევებისკენ გაუძღვეს. მადრიდელთა ერთ-ერთი მთავარი ფეხბურთელი ხორხე საენსია. ახალი სეზონის წინ მათ მიგელ დე ლა ფუენტე (€2m), ხუან კრუსი (€1m), ენრიკ ფრანკესა (€90k), რობერტო ლოპესი (უფასოდ), ხუან სორიანო (უფასოდ) და ვალენტინ როზიე (უფასოდ) დაიმატეს. ლეგანესიდან მიმდინარე ზაფხულში დიეგო კონდე (€4m), დანი ხიმენესი (უფასოდ), ლუის პერეა (უფასოდ), სერხიო ნავარო (უფასოდ), ხორხე მირამონი (უფასოდ), ალან ნიომი (უფასოდ), იკერ უნდაბარენა (უფასოდ) და ფრანსისკო პორტილიო (უფასოდ) წავიდნენ.

გუნდის მთავარი დამრტყმელი ძალა დე ლა ფუენტე უნდა იყოს, მაგრამ მის შესაძლებლობებთან დაკავშირებით ეჭვებიცაა. ლეგანესი მატჩში საშუალოდ მხოლოდ 0.64 გოლს უშვებდა და, შესაბამისად, ლა ლიგაში თამაშიც წინა სეზონის დაცვის ხაზით უნდა დაიწყოს, თუმცა მცირე ცვლილებით - მარჯვენა მცველის პოზიციას ახალწვეული როზიე დაიკავებს.

სავარაუდო XI (4-2-3-1): სორიანო - ფრანკესა, გონსალესი, საენზი, როზიე - ბრაშანაცი, ნეიუ - დანი რაბა, რობერტო ლოპესი, ხუან კრუსი - დე ლა ფუენტე

ვერდიქტი: სავარაუდოდ, ლეგანესს გადარჩენისთვის ბრძოლა მოუწევს, მაგრამ, დაწინაურებულ გუნდებს შორის, ისინი ყველაზე სტაბილურები ჩანან, რომელთაც ახალგაზრდა, პერსპექტიული მწვრთნელი ჰყავთ. თუ კლუბი შეტევას გააძლიერებს, ესპანეთის ჩემპიონატში ნორმალურად ითამაშებს.

მესამე გუნდი, რომელიც ლა ლიგაში გადავიდა, ესპანიოლი იყო. კატალონიელებმა პირდაპირ დაწინაურება ვერ მოახერხეს და ფლეიოფში თამაში მოუწიათ, რომლის ფინალშიც ოვიედო დაამარცხეს და უმაღლეს ლიგაში ერთწლიანი პაუზის შემდეგ დაბრუნდნენ.

ახალი სეზონის წინ გუნდმა, ჯერჯერობით, მხოლოდ ალვარო ტეხერო (უფასოდ) და კარლოს რომერო (იჯარით) დაიმატა , წასვლით კი არაერთი ფეხბურთელი წავიდა, მათ შორის, ხოსელუ (€1.5m), ოსკარ ხილი (უფასოდ) და მარტინ ბრეითუეიტი (უფასოდ). მათი გამორჩეული მოთამაშეები ჟოან გარსია და ხავი პაუდო არიან. ეს უკანასკნელი შეტევაში მთავარი ძალა უნდა იყოს. 

ესპანიოლის უმთავრესი მისია, სავარაუდოდ, დაქვეითებას თავიდან არიდება იქნება. თუმცა, გუნდი მიმდინარე სატრანსფერო ფანჯარაზე გაძლიერებას ჯერ კიდევ შეეცდება. კატალონიელებს ალეხო ველისს აქტიურად უკავშირებენ და, დიდი ალბათობით, ტრანსფერი შედგება. 

სავარაუდო XI (4-3-3): ჟოან გარსია - ოლივანი, კაბრერა, კალერო, ელ ჰილალი - ლოსანო, გრაგერა, აგუადო - პერე მილია, პუადო, კარერასი

ვერდიქტი: ესპანიოლი იმაზე სუსტი გუნდი ჩანს, ვიდრე 2021 წელს იყო, როცა დაწინაურდა, და იმაზე სუსტიც კი, ვიდრე 2023 წელს იყო, როცა გავარდა. ისინი სეგუნდაში დაქვეითების სერიოზული საფრთხის ქვეშ იქნებიან.