"მადლობა ლორიას, ის პირველი მივიდა დასახმარებლად", - ქართველი მეკარის გმირობა კვიპროსში
კვიპროსის ჩემპიონატის მორიგ ტურში "ანორთოსისმა" სტუმრად დაამარცხა "პააეკი", ანგარიშით 2:0. შეხვედრის 82-ე წუთზე მოხდა ინციდენტი, რომელსაც საბედნიეროდ მსხვერპლი არ მოჰყოლია.
ფამაგუსტური გუნდის მეკარე, გიორგი ლორია შეეჯახა მასპინძელთა ფეხბურთელს, ალექსანდროს კუროსს, რომელმაც შეტაკების შედეგად იმ მომენტში დაზიანებაც კი მიიღო.
კვიპროსელმა მოთამაშემ გონება დაკარგა, მასთან პირველი დასახმარებლად კი სწორედ ქართველი გოლკიპერი მივიდა. რამდენიმე წუთის გასვლის შემდეგ, "პააეკის" ფეხბურთელი საკაცით გაიყვანეს.
შეხვედრის დასრულების შემდეგ, კვიპროსული გუნდის კარის დარაჯს მადლობა გადაუხადა მასპინძელთა მთავარმა მწვრთნელმა, მაკის სერგიდესმა, რომელმაც აღნიშნა მისი გმირობა.
"პატივისცემა ლორიას. ის პირველი მივიდა დასახმარებლად, რადგან ინციდენტი ძალზე სერიოზული ჩანდა. ზოგჯერ, ამან შეიძლება, ადამიანის სიცოცხლეც იხსნას", - განაცხადა კვიპროსელმა.
