მანჩესტერ იუნაიტედის ფეხბურთელი ნეაპოლში? — ნაპოლი ტრანსფერზე მუშაობს

ზამთრის სატრანსფერო ფანჯრის მოახლოებასთან ერთად, ნაპოლი აქტიურად გეგმავს შემადგენლობის გაძლიერებას. კლუბი, რომელიც ორ ტურნირზე ასპარეზობს, იანვარში მინიმუმ ორი ახალი ფეხბურთელის დამატებას ისახავს მიზნად.

პარტენოპეის მთავარი სამიზნე მანჩესტერ იუნაიტედის ნახევარმცველი, კობი მეინუა, რომლის ტრანსფერიც ზაფხულში არ შედგა. ნაპოლის მთავარ მწვრთნელს, ანტონიო კონტეს, ახალგაზრდა ინგლისელის დამატება კვლავ სურს, რადგან თვლის, რომ ის გუნდის ნახევარდაცვას მნიშვნელოვნად გააძლიერებს.

თავად მეინუს მანჩესტერ იუნაიტედის დატოვება ჯერ კიდევ ზაფხულში სურდა, თუმცა, კლუბმა არ გაუშვა. მას შემდეგ ვითარება არ შეცვლილა — რუბენ ამორიმის ხელმძღვანელობით მას მცირე სათამაშო დრო ეძლევა. თუ სიტუაცია არ გამოსწორდა, დიდი ალბათობით, მეინუ იანვარში კლუბს დატოვებს და მოსალოდნელია, რომ ნაპოლის კონკურენციას სხვა გუნდებიც გაუწევენ.