მაროკო დიდი მიღწევის ზღვარზე და საფრანგეთი ისტორიულად უხერხული მეტოქის წინააღმდეგ

ტურნირის ერთ-ერთი მთავარი სენსაცია (თუ მთავარი არა) ესპანეთის გამოგდების შემდეგ მათ მეზობლებს, პორტუგალიის ნაკრებს დაუპირისპირდება, რომელმაც წინა შეხვედრაში ერთ-ერთი საუკეთესო პერფომანსი შემოგვთავაზა.

აფრიკული გუნდი მსოფლიო ჩემპიონატის ნახევარფინალში არასდროს გასულა - ყველაზე ახლოს ამასთან 2010-ში განა იყო, თუმცა მაშინ ლუის სუარესმა მეკარეობის კარგი სქილები გამოავლინა და თავისი ნაკრები სასწაულებრივად გადაარჩინა. წელს, მთელი კონტინენტის დამცველად მხოლოდ მაროკო დარჩა, რომელმაც უკვე რამდენიმე ტოპ-ევროპელს აჯობა: ჯგუფში ხორვატიაზე და ბელგიაზე კარგი პოზიცია დაიკავა, მერვედფინალში კი ესპანეთი ჩატოვა და ახლა პორტუგალიის კარს მიადგა ცელით ხელში.

პორტუგალიაში ცალკე ინტრიგა გვაქვს - რას იზამს ფერნანდუ სანტუში, კვლავ სკამზე დატოვებს რონალდუს? წინა მატჩის გმირ გონსალუ რამოშს ისევ სკამზე გადასვამს, ჰეთ-ტრიკის მიუხედავად, თუ ამ ორ ფეხბურთელს შეუწყვილებს ერთმანეთს? შვეიცარიასთან მატჩში კრიროს სკამზე დარჩენამ დიდი მითქმა-მოთქმა გამოიწვია, თუმცა, ფაქტია, გაამართლა - 2016 წლის ევროპის ჩემპიონებმა 6:1 ულამაზეს სტილში მოიგეს.

პორტუგალიის ნაკრები მსოფლიო ჩემპიონატის ნახევარფინალში 2006 წლის შემდეგ არ ყოფილა, მაშინ მათ გზაზე საფრანგეთის ნაკრები და ბრწყინვალე ზინედინ ზიდანი გადაეღობათ.

ურთიერთშეხვედრები: 2

მაროკო: 1 მოგება
ფრე: 0
პორტუგალია: 1 მოგება
მაროკოს გოლები: 3
პორტუგალიის გოლები: 2

პირველი მატჩი: 1986 წლის 1 ივნისი, მაროკო 3-1 პორტუგალია
მეორე მატჩი: 2018 წლის 20 ივნისი, მაროკო 0-1 პორტუგალია

მაროკოს ბოლო 5 მატჩი: 4 მოგება, 1 ფრე
პორტუგალიის ბოლო 5 მატჩი: 4 მოგება, 1 მარცხი

სავარაუდო შემადგენლობები:

მაროკო: ბონო, ჰაკიმი, საისი, აგერდი, მაზრაუი, ოუნაჰი, ამრაბატი, ამალაჰი, ზიეჩი, ენ ნესირი, ბუფალი

პორტუგალია: კოშტა, დალოტი, პეპე, დიაში, გერეირო, კარვალიუ, ბერნარდუ, ოტავიო, ბრუნო, რამოში, ფელიქსი.

23:00 ინგლისი - საფრანგეთი

მაროკოსთან და პორტუგალიასთან დიდი ბოდიშის მოხდით, ალბათ არავინ იკამათებს, რომ დღის ცენტრალური შეხვედრა ცოტა მოგვიანებით, თბილისის დროით 11 საათზე გაიმართება, როცა ინგლიგი და საფრანგეთი კლასიკურ ევროპულ დაპირისპირებაში გაარკვევენ გამარჯვებულს.

ეს არის მატჩი, რომელმაც უამრავ შეკითხვას უნდა გასცეს პასუხი - არის თუ არა ინგლისი მზად, რომ მსოფლიო ჩემპიონს ტოლსწორად ეთამაშოს და გააგდოს კიდეც? ვინ აპირებს საოცარ ფორმაში მყოფი კილიან მბაპეს შეჩერებას? იქნება თუ არა ინგლისი ის ნაკრები, რომელიც საფრანგეთის ზედიზედ მეორე მსოფლიო ჩემპიონობას შეაჩერებს? და ბევრი სხვა შიდა საკითხი, რომელიც დღეს მოედანზე უნდა გაირკვეს.

ორივე ამ გუნდმა ჯგუფური ეტაპი დამაჯერებლად გაიარა, ინგლისმა 7 ქულა დააგროვა, საფრანგეთმა კი პირველი ადგილის განაღდების შემდეგ, ტუნისთან მეორე შემადგენლობით წააგო და 6 ქულით გავიდა მერვედფინალში, სადაც პოლონეთი უშანსოდ, კილიან მბაპეს ბენეფისით დაამარცხა. თუმცა, ასევე უშანსოდ დატოვა ინგლისმაც სენეგალი, როცა 3:0 გაანადგურა. ამიტომ, მატჩს ორივე გუნდი კარგ ფორმაში ხვდება.

ურთიერთშეხვედრები: 31

ინგლისის მოგება: 17
ფრე: 5
საფრანგეთის მოგება: 9
ინგლისის გოლები: 69
საფრანგეთის გოლები: 39

პირველი მატჩი: 1923 წლის 10 მაისი, ინგლისი 4-1 საფრანგეთი
უკანასკნელი მატჩი: 2017 წლის 13 ივნისი, ინგლისი 2-3 საფრანგეთი

ინგლისის ბოლო 5 მატჩი: 3 მოგება, 2 ფრე
საფრანგეთის ბოლო 5 მატჩი: 3 მოგება, 2 მარცხი