მატჩის დღე — პსჟ ბაიერნს უმასპინძლებს, რეალი ლივერპულს ესტუმრება

ტურნირის მოქმედი ჩემპიონი, პარი სენ ჟერმერნი საკუთარ კედლებში საოცარ ფორმაში მყოფ მიუნხენის ბაიერნს უმასპინძლებს და რეკორდმაისტერის მოგებათა სერიის დასრულებას შეეცდება.

ჩემპიონთა ლიგის წლევანდელ სეზონში ორივე გუნდი უდანაკარგოდ ასპარეზობს და 3 ტურის შემდეგ 9 ქულა აქვთ. ბაიერნმა კი საერთ ჯამში წელს 14 მატჩი ჩაატარა და ყველას მოგება მოახერხა.

აღსანიშნავია, რომ ბაიერნი ბოლოს 5 ივლისს, მსოფლიო საკლუბო ჩემპიონატის პლეი-ოფში სწორედ პარიზულ კლუბთან დამარცხდა და მას შემდეგ ყველა დაპირისპირება მოიგო. გუნდების ბოლო 5 ურთიერთშეხვედრაში კი უპირატესობა გერმანელების მხარეს არის — 4 მოგება და 1 მარცხი.

დღევანდელ შეხვედრას ძირითადი შემადგენლობიდან დაიწყებს პარიზული კლუბის შემტევი, ხვიჩა კვარაცხელია, რომელმაც მიმდინარე სეზონში ჩემპიონთა ლიგაზე 2 გოლი გაიტანა და 1 ასისტი გაიფორმა.

ევროპული ფეხბურთის გრანდების დაპირისპირებას ვიხილავთ ენფლილდზეც, სადაც ლივერპული ტურნირის ყველაზე ტიტულოვან გუნდს, მადრიდის რეალს მიიღებს.

არნე სლოტის გუნდმა ჩემპიონთა ლიგის საწყის სამ ტურში 2 მატჩი მოიგო და 6 ქულით მე-10 ადგილზე იმყოფება, სამეფო კლუბი კი 9 ქულით სატურნირო ცხრილის თანალიდერია.

გუნდები ბოლოს ერთმანეთს ჩემპიონთა ლიგის გასულ სეზონში შეხვდნენ, სადაც ლივერპულმა 2-0 მოიგო. ხოლო 5 ურთიერთდაპირისპირებაში კი უპირატესობას მადრიდული გრანდი ფლობს — 3 მოგება, 1 ფრე და 1 წაგება.

რეალის წინააღმდეგ მატჩში ლივერპულის კარს გიორგი მამარდაშვილი დაიცავს, რომელმაც მიმდინარე სეზონში უკვე 7 მატჩში მიიღო მონაწილეობა და კარი მშრალად ორჯერ შეინახა.

ჩემპიონთა ლიგა, დღევანდელი სათამაშო დღის განრიგი

21:45 ნაპოლი V აინტრახტი
21:45 სლავია V არსენალი
23:55 ლივერპული V რეალი
23:55 პსჟ V ბაიერნი
23:55 იუვენტუსი V სპორტინგი
23:55 ატლეტიკო V სენტ-ჟილი
23:55 ტოტენჰემი V კოპენჰაგენი
23:55 ბოდო გლიმტი V მონაკო
23:55 ოლიმპიაკოსი V პსვ