მატჩის დღე: საინტერესო მატჩები ტოპ 5 ლიგაში და ხვიჩა კვარაცხელიას დებიუტის მოლოდინში

ინგლისის ჩემპიონატის 23-ე ტურის ცენტრალური შეხვედრა ეტიჰადზე, მანჩესტერ სიტისა და ჩელსის შორის შედგება - სატურნირო ცხრილში მეზობლები, რომელთაც ერთმანეთთან მხოლოდ 2 ქულა აშორებთ. ენცო მარესკას გუნდის ანგარიშზე 40 ქულაა, პეპ გვარდიოლას შეგირდებს კი 38 ქულა აქვთ - შესაბამისად, თუ სიტი მოიგებს, 4-ეულში შევა, "არისტოკრატებს" კი ჩემპიონთა ლიგის ზონაში დასარჩენად უბრალოდ არწაგებაც ჰყოფნით. "ქალაქელებმა" ჩემპიონთა ლიგაზე, პარი სენ-ჟერმენთან ძალიან მნიშვნელოვანი მატჩი წააგეს და ახლა ხასიათის გამოკეთება მართებთ.

ლიდერი ლივერპული, რომელიც უახლოეს მდევარ არსენალს 6 ქულით უსწრებს, ამ ტურში, აუტსაიდერ იფსვიჩს შეხვდება.

19:00 — ბორნმუთი 🆚 ნოტინგემი

19:00 — ბრაიტონი 🆚 ევერტონი

19:00 — ლივერპული 🆚 იფსვიჩი

19:00 — საუთჰემპტონი 🆚 ნიუკასლი

19:00 — ვულვზი 🆚 არსენალი

21:30 — მანჩესტერ სიტი 🆚 ჩელსი

21-ე ტურში ჩემპიონობისთვის მებრძოლი ატლეტიკო ვილიარეალს დაუპირისპირდება. დიეგო სიმეონეს გუნდს ამ მომენტისთვის 44 ქულა აქვს, შედეგად, მესამეზე მყოფ ბარსელონას 5 ქულით უსწრებს, ლიდერ რეალ მადრიდს კი 2 ქულით ჩამორჩება. შესაბამისად, "როხიბლანკოს" ამ ტურში შანსი აქვს, ჩემპიონატში გალიდერდეს.

თავის მხრივ, რეალ მადრიდი საკმაოდ მარტივ მეტოქეს, ვალიადოლიდს ხვდება (მართალია, გასვლაზე, მაგრამ მაინც) და შეუძლია, ლიდერობა განიმტკიცოს.

აღსანიშნავია, რომ 21-ე ტურის ერთი მატჩი უკვე გაიმართა, რომელშიც ერთმანეთს ლას პალმასი და ოსასუნა დაუპირისპირდნენ. შეხვედრა ფრედ, 1-1 დასრულდა.

17:00 — მალიორკა 🆚 ბეტისი

19:15 — ატლეტიკო 🆚 ვილიარეალი

21:30 — სევილია 🆚 ესპანიოლი

23:55 — ვალიადოლიდი 🆚 რეალ მადრიდი

იტალიაში ცენტრალური შეხვედრა ნეაპოლი უმასპინძლებს - ლიდერი ნაპოლი მე-5 ადგილზე მყოფ იუვენტუსს შეერკინება. ანტონიო კონტეს გუნდს 50 ქულა აქვს და უახლოეს მდევარ ინტერს 3 ქულით უსწრებს.

18:00 — კომო 🆚 ატალანტა

21:00 — ნაპოლი 🆚 იუვენტუსი

23:45 — ემპოლი 🆚 ბოლონია

მე-19 ტურში ბუდუ ზივზივაძის ჰაიდენჰაიმი გასვლაზე აუგსბურგს ეთამაშება. ამჟამად, ჰაიდენჰაიმს 14 ქულა აქვს და გასავარდნ ზონაში იმყოფება. იმ შემთხვევაში, თუ ჰაიდენჰაიმი მოიგებს და ჰოფენჰაიმი წააგებს, ბუდუს გუნდს წითელი ზონიდან თავის დაღწევის შანსი ექნება, მაგრამ, შესაძლოა, ბურთების სხვაობის გამო მაინც ამჟამინდელ პოზიციაზე დარჩეს.

გერმანიის ჩემპიონატის ლიდერი ბაიერნი ამ ტურში ფრაიბურგს ესტუმრება და შეეცდება, ჩემპიონთა ლიგაზე ფეინოორდთან განცდილი მძიმე მარცხის შემდეგ, ბუნდესლიგურ მატჩში გამარჯვება მოიპოვოს.

ძალიან საინტერესო მატჩი გაიმართება ლაიფციგში, სადაც ადგილობრივი გუნდი მეორეადგილოსან ლევერკუზენს უმასპინძლებს. ჩაბი ალონსოს გუნდი ბაიერნს 4 ქულით ჩამორჩება, თავად ლაიფციგს კი 31 ქულა აქვს და ოთხეულამდე მხოლოდ 1 ქულა აშორებს. შტუტგარტი, რომელიც სწორედ მე-4 პოზიციაზეა, მე-19 ტურში გასვლაზე მაინცს ეთამაშება.

18:30 — აუგსბურგი 🆚 ჰაიდენჰაიმი

18:30 — დორტმუნდი 🆚 ვერდერი

18:30 — ფრაიბურგი 🆚 ბაიერნი

18:30 — მაინცი 🆚 შტუტგარტი

18:30 — ლაიფციგი 🆚 ლევერკუზენი

21:30 — გლადბახი 🆚 ბოხუმი

საფრანგეთში ჩვენი მთავარი ყურადღება, რა თქმა უნდა, პარკ დე პრენსისკენაა მიპყრობილი, სადაც, შესაძლოა, პარი სენ-ჟერმენის რიგებში ხვიჩა კვარაცხელიას დებიუტი შედგეს. პსჟ, რომელიც, რა საკვირველია, ჩემპიონატს ლიდერობს, საკუთარ მოედანზე რეიმსს მიიღებს.

20:00 — მონაკო 🆚 რენი

22:00 — სტრასბურგი 🆚 ლილი

23:55 — პსჟ 🆚 რეიმსი

სერია B-ში გიორგი კვერნაძის ფროზინონე სუდტიროლს უმასპინძლებს, გიორგი ჩაკვეტაძის უოტფორდი კი ჩემპიონშიფში ქოვენთრის ესტუმრება. ამასთან, სეგუნდა დივიზიონში გიორგი ქოჩორაშვილის ლევანტე სტუმრად დეპორტივო ლა კორუნიას ხვდება, თუმცა, ტრავმის გამო, ქართველი ფეხბურთელი ამ მატჩში თავის გუნდს ვერ დაეხმარება.

18:00 — ფროზინონე 🆚 სუდტიროლი

18:30 — აუგსბურგი 🆚 ჰაიდენჰაიმი

19:00 — ქოვენთრი 🆚 უოტფორდი

21:30 — დეპორტივო 🆚 ლევანტე

23:55 — პსჟ 🆚 რეიმსი