ავტორიზაცია
მილანი 🆚 ნაპოლი | ხვიჩა კვარაცხელია უხერხული მეტოქის წინააღმდეგ
დღეს, სერია A-ს მე-10 ტურში ძალიან საინტერესო მატჩი გაიმართება - მილანი ნაპოლის წინააღმდეგ.
"როსონერის" წინა ტურის თამაში წყალდიდობის გამო გადაუდეს. მილანის პრეზიდენტმა ბოლონიასთან მატჩით გადადების გადაწყვეტილება გააკრიტიკა, რადგან, შედეგად, დღევანდელ მნიშვნელოვან შეხვედრას, დისკვალიფიკაციის გამო, ტეო ერნანდესი და ტიჯანი რეინდერსი გამოტოვებენ. გარდა ამისა, მილანს ტემი აბრაჰამი, ისმაელ ბენასერი, ალესანდრო ფლორენცი, მატეო გაბია და ლუკა იოვიჩი აკლია.
ამჟამად, მილანი ნაპოლის 8 ქულით ჩამორჩება, მაგრამ 1 მატჩის ნაკლები აქვს ჩატარებული. პაულუ ფონსეკას გუნდი იმედოვნებს, რომ სახლში კარს მშრალად ზედიზედ მეოთხედ შეინახავს. გუნდს ბოლო 7 საშინაო მატჩი არ წაუგია.
თავის მხრივ, ნაპოლი კარგ ფორმაშია. ნეაპოლელებმა ბოლო 2 მატჩში ერთნაირი ანგარიშით - 1-0 იმარჯვეს და ბოლო 7 შეხვედრაში მხოლოდ 1 გოლი გაუშვეს. ანტონიო კონტეს პაულუ ფონსეკას წინააღმდეგ არასდროს დამარცხებულა: 1 მოგება, 3 ფრე.
ნაპოლის დაცვა სოლიდურად გამოიყურება და გასვლაზე 3 მატჩია, გოლი არ გაუშვია. ტიტულზე ფიქრი ჯერ ნაადრევია, მაგრამ გუნდი სატურნირო ცხრილში პირველ ადგილზე იმყოფება და მეორეადგილოსან ინტერს 4 ქულით უსწრებს. კონტე შეგირდებმა 9 ტურში 7 მატჩი მოიგეს, 1 ფრედ დაასრულეს და 1 წააგეს. დღევანდელ შეხვედრაში ნაპოლის სტანისლავ ლობოტკა დააკლდება.
აღსანიშნავია, რომ ხვიჩა კვარაცხელიას მილანის წინააღმდეგ არცისე კარგი სტატისტიკა აქვს: 6 მატჩში 1 მოგება, 2 ფრე, 3 წაგება, 0 გოლი და მხოლოდ 1 ასისტი. დღეს ქართველს სტატისტიკის გამოსწორების შანსი ექნება.
მილანის სავარაუდო XI: მენიო; ემერსონი, ჩაო, პავლოვიჩი, ტერაჩანო; ფოფანა, ლოფტუს-ჩიკი; ჩუკვუეზე, პულიშიჩი, ოკაფორი; მორატა
ნაპოლის სავარაუდო XI: მერეტი; დი ლორენცო, რაჰმანი, ბუონჯორნო, ოლივეირა; ანგისა, გილმორი; პოლიტანო, მაკტომინეი, კვარაცხელია; ლუკაკუ
შეხვედრა სტარტს 23:45 საათზე აიღებს.
