მუნდიალის საუკეთესო მატჩი და შედეგი, რომელიც არცერთს არ აწყობდა

ერთმანეთს კამერუნისა და სერბეთის ნაკრებები დაუპირისპირდნენ და შეხვედრა ფრედ, 3:3 დასრულდა.

29-ე წთზე ანგარიში კასტელეტომ გახსნა და აფრიკული გუნდი დააწინაურა, თუმცა ტაიმის მიწურულს, დამატებით დროში, სერბებმა პავლოვიჩის და მილინკოვიჩ-სავიჩის დახმარებით ორი სწრაფი გოლი გაიტანეს და საწყისი 45 წუთი თავისი გამარჯვებით დაასრულეს.

53-ზე მიტროვიჩმა სერბების გამარჯვება კიდევ უფრო მოაახლოვა, თუმცა სიტუაცია 55-ე წუთზე ვინსენტ აბუბაკარის შემოსვლამ შეცვალა, რომელმაც 63-ზე ჯერ თვითონ გაიტანა, 66-ზე კი ჩუპო მოტინგს გაატანინა და ამ გოლით, საბოლოო ანგარიშიც დაფიქსირდა.

შეიძლება ითქვას, რომ ეს შედეგი არცერთ გუნდს არ აწყობდა, რადგან ორივემ პირველ ტურში მარცხი იწვნიეს - ჯერჯერობით, ჯგუფიდან გასვლის შანსი არცერთს არ დაუკარგავს, თუმცა ყველაფერი მათზე დამოკიდებული აღარ არის.