ნაპოლიმ ხვიჩა კვარაცხელიას ულტიმატუმი წაუყენა

La Gazzetta dello Sport-ის ინფორმაციით, ნაპოლიმ ხვიჩა კვარაცხელიას ულტიმატუმი წაუყენა - თუ ქართველი ფეხბურთელი სეზონის ბოლომდე ახალ კონტრაქტს არ გააფორმებს, "პარტენოპეი" ზაფხულში მას გაყიდის. კლუბი ფინანსურ მოგებაზე ფიქრობს, შესაბამისად, უახლოეს თვეებში სიტუაცია თუ არ შეიცვლება, 23 წლის ვინგერის გაყიდვა დღის წესრიგში დადგება.

ნაპოლი და კვარაცხელიას წარმომადგენლები ახალ კონტრაქტზე უკვე რამდენიმე თვეა, მუშაობენ. "პარტენოპეი" ხვიჩას დაახლოებთ €6-მილიონიან ხელფასს სთავაზობს, ფეხბურთელის აგენტი კი €8 მილიონს ითხოვს. შეთანხმება ვერ ხერხდება გამოსასყიდ თანხაზეც - ნაპოლის სურვილია, კონტრაქტში მინიმუმ €100 მილიონი ჩაიწეროს, როცა ქართველი შემტევის წარმომადგენლები მხოლოდ €80 მილიონზე არიან თანახმა. დიდი შანსია, იტალიური კლუბი დათმობაზე არ წავიდეს და ახალი შეთავაზება აღარ გააკეთოს. 

ქართველი ფეხბურთელის სიტუაციას ტოპ კლუბები ყურადღებით აკვირდებიან. კვარაცხელია სეზონის ბოლომდე ახალ კონტრაქტს თუ არ გააფორმებს, პსჟ და ბარსელონა ტრანსფერზე მუშაობას დაიწყებენ. ზაფხულის მოახლოებასთან ერთად, მოსალოდნელია სხვა გუნდების გააქტიურებაც.

ხვიჩა კვარაცხელიას ნაპოლისთან არსებული კონტრაქტი 2027 წლამდე აკავშირებს.