“ნეიმარი ჩვენი დონის არ არის” — პრინცი, რომელსაც ალ ჰილალიდანაც აგდებენ

“ნეი არ დავარეგისტრირეთ, მაგრამ მას აზიის ჩემპიონთა ლიგაზე თამაში შეუძლია. მინდა, აღნიშნულ ტურნირზე ჩვენთან იყოს - ასევე, მსოფლიო საკლუბო ჩემპიონატზე, თუ, რა თქმა უნდა, იმ დროისთვის ორივე გუნდში ვიქნებით.

ის მსოფლიო კლასის ფეხბურთელია, თუმცა, უნდა ითქვას, რომ ბრაზილიელი ფიზიკურად იმ დონეს ვერ აკმაყოფილებს, რომელზეც ჩვენ ვართ.”

ნეიმარი ალ ჰილალში 2023 წელს გადავიდა და მას შემდეგ, ტრავმების გამო, მხოლოდ 7 მატჩი ჩაატარა (1 გოლი, 3 ასისტი).

ბრაზილიელმა, დაზიანებების გამო, საუდის არაბეთში გადაბარგების შემდეგ 68 შეხვედრა გამოტოვა. ერთ-ერთი ტრავმის “წყალობით” მას 1 წელი გაუცდა, დაბრუნების შემდეგ კი, მეორე მატჩშივე, კვლავ დაშავდა. ის მოედანზე ბოლოს გასული წლის 4 ნოემბერს, ირანული ესტეღლალის (3-0) წინააღმდეგ ვიხილეთ. მანამდე, ნეი მწვანე მინდორზე 2024 წლის 21 ოქტომბერს, საამიროების ალ აინთან შეხვედრაში (5-4) გავიდა - ეს 2023 წლის 19 ოქტომბრის შემდეგ მისი პირველი მატჩი იყო.

ჟუნიორმა 2024 წელს არაბული კლუბის მაისურით მხოლოდ 2-ჯერ ითამაშა (ჯამში: 42 წუთი) და ხელფასის სახით €101 მილიონი ჩაერიცხა.

ნეიმარს ამერიკის შეერთებულ შტატებში გადაბარგებას უწინასწარმეტყველებენ - ბოლოს მას ჩიკაგო ფაირი დაუკავშირეს. ასევე, ცნობები გავრცელდა მშობლიურ სანტოსში დაბრუნებასა და ინტერ მაიამიში გადასვლაზე, რომელშიც მისი ყოფილი თამაგუნდელები (ლიონელ მესი, ლუის სუარესი, სერხიო ბუსკეტსი და ჟორდი ალბა) ასპარეზობენ.