ოფიციალურად: მაურისიო პოჩეტინო ამერიკის შეერთებული შტატების ნაკრების ახალი მთავარი მწვრთნელია

ოფიციალური ინფორმაციით, მაურისიო პოჩეტინო ამერიკის შეერთებული შტატების ნაკრების ახალი მთავარი მწვრთნელია.

აშშ-ის ფეხბურთის ფედერაციის უელსელი სპორტული დირექტორი, მეტ კროკერი ამბობს: "მაურისიო სერიული გამარჯვებულია. მას ფეხბურთელების განვითარების სურვილი ამოძრავებს და დამტკიცებული აქვს, რომ კონკურენტუნარიანი გუნდების აწყობა შეუძლია. მჯერა, რომ სწორი გადაწყვეტილება მივიღეთ და პოჩეტინო ჩვენი შემადგენლობია პოტენციალს გამოიყენებს."

ქომაგებს თავად არგენტინელმა სპეციალისტმაც მიმართა: "ძალიან ბედნიერი ვარ, რომ ამერიკის ეროვნული ნაკრების მთავარი მწვრთნელი გავხდი. ეს დიდებული შესაძლებლობაა. გუნდს ცინცინატიში გასამართ დღევანდელ მატჩში წარმატებებს ვუსურვებ. მალე გნახავთ."

ამერიკის შეერთებულ შტატებს გრეგ ბერჰალტერი წვრთნიდა, რომელიც კოპა ამერიკის შემდეგ გაუშვეს.

რაც შეეხება პოჩეტინოს: იგი ბოლოს ჩელსის თავკაცი იყო. მან ლონდონური კლუბი მიმდინარე წლის ზაფხულში დატოვა. ახლა კი მაურისიო აშშ-ს ჩაიბარებს და 2026 წლის მსოფლიო ჩემპიონატისთვის (რომელსაც, კანადასა და მექსიკასთან ერთად, ამერიკაც უმასპინძლებს) მოამზადებს.