ოფიციალურად: რუდ ვან ნისტელროი ლესტერის მთავარი მწვრთნელია

ლესტერ სიტიმ ოფიციალურად დაადასტურა, რომ გუნდის ახალი მთავარი მწვრთნელი რუდ ვან ნისტელროი იქნება. ნიდერლანდელმა "მელიებთან" 3-წლიანი კონტრაქტი გააფორმა.

აიავატ შრივადჰანაფრაბჰა (ლესტერის თავმჯდომარე): "დიდი სიამოვნებაა, რომ რუდი აქაა. ის ისტორიულ კლუბს უერთდება, რომელსაც დიდებული ქომაგები და კარგი შემადგენლობა ჰყავს. ეჭვგარეშეა, რომ რუდის გამოცდილება, ცოდნა და მენტალიტეტი დიდ ღირებულებებს მოგვიტანს. მოუთმენლად ველით, რომ მას წარმატებების მიღწევაში მხარი დავუჭიროთ."

ვან ნისტელროი: "ამაყი და აღფრთოვანებული ვარ. რა თქმა უნდა, კლუბის ბოლოდროინდელი ისტორია შთამბეჭდავია. მუშაობის დაწყებას მოუთმენლად ველი. მინდა, ყველა მალე გავიცნო და ლესტერისთვის ყველაფერი გავიღო, რაც შემიძლია."

აქამდე, ვან ნისტელროის მთავარ მწვრთნელად პსვ-ს ახალგაზრდულ და პირველ გუნდში უმუშავია, შემდეგ კი მანჩესტერ იუნაიტედში ასისტენტად დაინიშნა. ერიკ ტენ ჰაგის გაშვების შემდეგ, ის "წითელი ეშმაკებს" დროებითი თავკაცის რანგში 4 მატჩში გაუძღვა - ამ 4 დაპირისპირებიდან იუნაიტედი ორჯერ სწორედ ლესტერს შეხვდა და ორივე შემთხვევაში გაანადგურა (5-2 და 3-0).

რაც შეეხება ლესტერის წინა მწვრთნელს: ჩელსიში წასული ენცო მარესკას ნაცვლად, "მელიებმა" სტივ კუპერი მიიყვანეს, მაგრამ უელსელი სპეციალისტი, ცოტა ხნის წინ, დაკავებული თანამდებობიდან გაათავისუფლეს.