პირველად ისტორიაში — შოუ ტაიმებს შორის მსოფლიო ჩემპიონატზე

პირველად მსოფლიო ჩემპიონატის ისტორიაში - ტურნირის ფინალში, სუპერბოულის სტილში, შესვენებაზე, გასართობი შოუ გაიმართება.

FIFA-ს პრეზიდენტმა, ჯანი ინფანტინომ განაცხადა, რომ უდიდესი სპორტული მოვლენა ასეთ შოუს იმსახურებს და რომ ეს ისტორიული მომენტი იქნება.

აღსანიშნავია, რომ შოუს ორგანიზებაში დიდ როლს ბრიტანული როკბენდი Coldplay შეასრულებს, მაგრამ ეს ჯერ ოფიციალურად დადასტურებული არაა. თუმცა, FIFA ადასტურებს, რომ ამ ბენდის წევრები - კრის მარტინი და ფილ ჰარვი შოუსთვის არტისტების არჩევაში მონაწილეობას მიიღებენ.

ტრადიციულად, ფეხბურთში შესვენება 15 წუთი გრძელდება, სუპერბოულში კი, რომელშიც შოუს გამართვა აქამდეც მიღებული იყო, 30 წუთი. FIFA-ს ჯერ არაფერი უთქვამს იმასთან დაკავშირებით, სტრუქტურა ფეხბურთში რამდენად შეიცვლება და ტაიმებს შორის შუალედი გაიზრდება თუ არა.

მომდევნო მუნდიალის ფინალი 2026 წლის 19 ივლისს, ნიუ ჯერსიში გაიმართება.