[პრევიუ] მოგებას მოწყურებული ესპანეთი საქართველოს ნაკრებისა და 55 ათასი გულშემატკივრის წინააღმდეგ

რა თქმა უნდა, ამ მატჩზე დასასწრები ყველა ბილეთი უკვე გაყიდულია და "დინამო არენა" სავსე ტრიბუნების მოლოდინშია.

სატურნირო თვალსაზრისით, ორივე ნაკრებს აუცილებლად 3 ქულა სჭირდება, რათა ევრო 2024-ის საგზურის მოპოვების რეალური შანსი შეინარჩუნონ.

ამჟამად, ჩვენს ნაკრებს 4 ქულა აქვს და მეორე ადგილზეა, ესპანეთს კი 3 ქულა აქვს, თუმცა ერთი მატჩით ნაკლები აქვს ჩატარებული.

იშვიათად ხდება, მაგრამ ფაქტია - ყველა ის ფეხბურთელი, ვინც სანიოლმა ნაკრებში გამოიძახა, მზადყოფნაშია და არაფერი არ აწუხებს.

"საინტერესო თამაში გველის. ესპანეთი ევროპის ერთ-ერთი უძლიერესი ნაკრებია და რთული მატჩი გველის. ჩემი მხრიდან ფეხბურთელებზე არანაირი ზეწოლა არ იქნება. ჩევნი მიზანია, ვითამაშოთ დისციპლინით, შევასრულოთ დავალება და დანარჩენი, მოედანზე გამოჩნდება", - განაცხადა ვილი სანიოლმა.

ხვიჩა კვარაცხელია: "საქართველოს ნაკრებისთვის ყოველთვის მაქსიმუმს ვაკეთებ, არ აქვს მნიშვნელობა, მზად ვარ 90 წუთისთვის თუ არა. წინა დღეებში ყველაფერს ვაკეთებდი, რომ კარგ კონდიციებში ვყოფილიყავი და ამჟამად, 90 წუთი სათამაშოდ მზად ვარ."

ესპანეთის ნაკრების მთავარი მწვრთნელი დე ლა ფუენტე კი თვლის, რომ დღეს მის ნაკრებს ურთულესი მატჩი ელის:

"ბოლო პერიოდში, საქართველოს ნაკრებმა თამაშის ხარისხი გააუმჯობესა. მათი ფეხბურთელები მაღალი დონის კლუბებში თამაშობენ და რთული მატჩი გველის. კვარაცხელია მაღალი დონის მოთამაშეა, მაგრამ მთავარი გუნდურობაა. სანიოლმა ყველაფერი იდეალურად გააკეთა და საქართველოს ნაკრები ერთ გუნდად ჩამოაყალიბა. საქართველოს ნაკრების ყველა მატჩს თვალს ვადევნებდი და როგორც აღვნიშნე, კარგი თაობა მოდის და შესაძლოა, ქართული ფეხბურთის ისტორიაში საუკეთესო თაობაც იყოს. თავის მხრივ, ჩვენს მოტივირებულები ვართ, გამარჯვებისთვის ჩამოვედით და ის შედეგი უნდა დავაფიქსიროთ, რაც ჩვენ გვინდა", - განაცხადა დე ლა ფუენტემ.

დრო და ადგილი: დინამო არენა, თბილისი (20:00)

მთავარი მსაჯი: დანიელ სებერტი (გერმანია)

მამარდაშვილი, გოჩოლეიშვილი, კვერკველია, კაშია, დვალი, აზაროვი, კიტეიშვილი, აბურჯანია, კვარაცხელია, ლობჟანიძე, მიქაუტაძე