ავტორიზაცია
პსჟ-ს ლილიან ტურამის შვილის ყიდვა უნდა და ახალი მწვრთნელის დახმარების იმედი აქვს
"პარი სენ ჟერმენის" ხელმძღვანელობა "ნიცას" ჩამშლელი ნახევარმცველის, კეფრენ ტურამის ხელში ჩაგდებით ინტერესდება.
როგორც გავლენიანი ფრანგული გამოცემა L'Equipe წერს, სპორტულ საკითხებში პარიზელთა მრჩეველი, ლუიშ კამპუში საფრანგეთის ნაკრების ექს-მცველის, ლილიან ტურამის 21 წლის შვილის შეძენის შესაძლებლობას განიხილავს.
აღნიშნულ ტრანსფერზე მუშაობისას დედაქალაქურ კლუბს გუნდის ახალი მთავარი მწვრთნელის, კრისტოფ გალტიეს დახმარების იმედი აქვს, რომელიც აქამდე "ნიცაში" მუშაობდა.
ცნობისთვის, ახალგაზრდა ნახევარმცველის კონტრაქტის ვადა 2025 წლის 30 ივნისამდეა გათვლილი და მისი ამჟამინდელი სატრანსფერო ფასი 17 მილიონ ევროს შეადგენს.
გასულ სეზონში კეფრენ ტურამმა ყველა ტურნირზე ერთად "ნიცას" მაისურით 41 მატჩი ჩაატარა, 4 გოლი გაიტანა და 3 შედეგიანი პასიც მიითვალა.
