"პსჟ-სთვის უმნიშვნელოვანესი ფეხბურთელია", - პოჩეტინო მბაპეს მომავალზე ალაპარაკდა

"პსჟ"-ს მთავარმა მწვრთნელმა, მაურისიო პოჩეტინომ განაცხადა, რომ თავდამსხმელი, კილიან მბაპე ძალიან სჭირდება.

მოგეხსენებათ, მოქმედი ხელშეკრულების ვადა 22 წლის ფეხბურთელს პარიზელებთან 2022 წელს ეწურება.

"კილიანი გუნდისთვის უმნიშვნელოვანესი ფეხბურთელია, ერთ-ერთი ყველაზე მნიშვნელოვანი. იმედი გვაქვს, მრავალი წლის განმავლობაში ასე იქნება", - აცხადებს არგენტინელი სპეციალისტი.

"ვიმედოვნებთ, პარიზში დიდხანს დარჩება, ეს ყველასათვის კარგი იქნება", - ციტირებს პოჩეტინოს სიტყვებს Canal+.

მბაპე "პსჟ"-ში "მონაკოდან" 2017 წელს გადავიდა. მიმდინარე სეზონში მან ყველა ტურნირზე ერთად 31 მატჩი ჩაატარა, 23 გოლი გაიტანა და 9 შედეგიანი გადაცემა გააკეთა.

Transfermarkt-ის ვერსიით, პარიზელთა სუპერვარსკვლავის სატრანსფერო ღირებულება 180 მილიონ ევროს შეადგენს.