ქართველები პრემიერ ლიგაში და მათი შედეგები

აღსანიშნავია, რომ ინგლისის უმაღლეს ლიგაში 5 ქართველს უთამაშია - გიორგი ქინქლაძეს, რატი ალექსიძეს, ზურაბ ხიზანიშვილს, თემურ ქეცბაიასა და მიხეილ ყაველაშვილს.

ქინქლაძე 1995 წელს, დინამო თბილისიდან მანჩესტერ სიტიში გადავიდა, სადაც თავისი გუნდის ყველაზე გამორჩეული ფეხბურთელი და ლიდერი იყო. გიორგიმ პრემიერ ლიგაში 4 სეზონი გაატარა, 102 მატჩი ჩაატარა (რაც ქართველებს შორის საუკეთესო მაჩვენებელია), 7 გოლი გაიტანა და 13 ასისტი მიითვალა. ქართველმა სიტი 1998 წელს დატოვა, 1999-დან 2003 წლამდე კი დერბი ქაუნთიში ასპარეზობდა.

ალექსიძე ერთადერთი ქართველია, ვისაც ჩელსიში უთამაშია. ის ლონდონურ კლუბს 1999 წელს, თბილისის დინამოდან შეუერთდა და 2001 წლამდე დარჩა. რატიმ პრემიერ ლიგაში მხოლოდ 2 მატჩი ჩაატარა. კლაუდო რანიერიმ ქართველი ცენტრფორვარდი დერბი ქაუნთისთან (4-1) და მიდლსბროსთან (0-1) ათამაშა. "არისტოკრატთა" რიგების დატოვების შემდეგ, ალექსიძე დინამოში დაბრუნდა.

ხიზანას 3 ინგლისურ კლუბში უთამაშია - ბლექბერნ როვერსში, ნიუკასლ იუნაიტედსა და რედინგში. ქართველი ბლექბერნში 2005 წელს იჯარით გადავიდა, რის შემდეგაც გამოისყიდეს და ამ გუნდის საკუთრებაში 2011 წლამდე იყო. ნიუკასლსა და რედინგში ზურაბი სწორედ ბლექბერნიდან იყო განათხოვრებული. ხიზანიშვილმა პრემიერ ლიგაში 62 მატჩი ჩაატარა, 1 გოლი გაიტანა და ამდენივე ასისტი მიითვალა. ქართველმა აღნიშნული გოლი მანჩესტერ სიტის გაუტანა.

ქეცბა 1997-2000 წლებში ნიუკასლში ასპარეზობდა, შემდეგ კი 1 წელი ვულვერჰემპტონში გაატარა. თემურმა პრემიერ ლიგაში 77 მატჩი ჩაატარა, 8 გოლი გაიტანა, რაც ქართველებს შორის სარეკორდო შედეგია, და 9 ასისტი მიითვალა. ის ინგლისის ჩემპიონატში შესანიშნავად თამაშობდა და არაერთი დასამახსოვრებელი მომენტი გვაჩუქა. გამოსარჩევია ქეცბაიას გოლი ვულვზის რიგებში, შეფილდ უენსდის კარში, როდესაც, ჯარიმის გათამაშების შემდეგ, შორეული დარტყმით შედევრი შექმნა (თუმცა ეს გოლი პრემიერ ლიგაში არ გაუტანია).

ყაველაშვილი 1995-1997 წლებში მანჩესტერ სიტის ღირსებას იცავდა. კონკრეტულად პრემიერ ლიგაში, ქართველმა მხოლოდ 4 მატჩი ჩაატარა და 1 გოლი გაიტანა, მაგრამ ეს 1 ბურთი მან მანჩესტერულ დერბიში იუნაიტედს შეუგდო - მიხეილმა 39-ე წუთზე პიტერ შმეიხელის კარი აიღო და ანგარიში გაათანაბრა, მაგრამ მისი გუნდი 2-3 დამარცხდა.

აღსანიშნავია, რომ ინგლისში მურთაზ შელიასა (მანჩესტერ სიტი) და კახა ცხადაძესაც (მანჩესტერ სიტი) უთამაშიათ, მაგრამ ისინი პრემიერ ლიგაში არ იყვნენ, რადგან მაშინ სიტი ქვედა ლიგაში იყო. გარდა ამისა, ლაშა დვალი 2013-2015 წლებში რედინგში ირიცხებოდა, თუმცა ქართველს იქ 1 მატჩიც კი არ ჩაუტარებია. ასევე, ამჟამად ინგლისში გიორგი ჩაკვეტაძე ასპარეზობს, მაგრამ მისი უოტფორდი ჩემპიონშფშია.