რაფინიას 3 გამორჩეული მიღწევა ბაიერნთან მატჩში

თარიღი: 24 Oct 2024, 18:07

გუშინ რაფინია ბელოლიმ ბაიერნს 3 გოლი გაუტანა და თავის გუნდს პრინციპულ მეტოქესთან უმნიშვნელოვანესი დაპირისპირება მოაგებინა.

Opta-ს ინფორმაციით, რაფინია ბარსელონას ისტორიაში მე-4 ბრაზილიელი გახდა, ვინც ჩემპიონთა ლიგაზე ჰეთ-თრიქი შეასრულა. აქამდე, ბარსას მაისურით 1 მატჩში 3 გოლი რივალდომ (2000 წელს, მილანის წინააღმდეგ), რონალდინიომ (2005 წელს, უდინეზეს წინააღმდეგ) და ნეიმარმა (2013 წელს, სელტიკის წინააღმდეგ) გაიტანეს.

ამასთან, რაფინია ასევე მე-4 ფეხბურთელია, ვისაც ჩემპიონთა ლიგაზე ბაიერნისთვის ჰეთ-თრიქი შეუსრულებია. ბელოლის გარდა, გერმანული გუნდის კარში 3 გოლი როი მაკაის (დეპორტივო), სერხიო აგუეროსა (მანჩესტერ სიტი) და კრიშტიანუ რონალდუს (რეალი) გაუტანიათ.

საინტერესოა ისიც, რომ რაფინიამ პირველი გოლი 57-ე წამზე გაიტანა, რაც ბარსელონას ისტორიაში ჩემპიონთა ლიგაზე მე-2 ყველაზე სწრაფი გოლია. 2005 წელს, ამაზე სწრაფი გოლი მარკ ვან ბომელმა შეაგდო, რომელმაც პანათინაიკოსის კარი 36 წამში აიღო.

"ასეთ დიდ მატჩებში თამაშზე ყოველთვის ვოცნებობდი," - განაცხადა ბრაზილიელმა მატჩის შემდეგ.

მიმდინარე სეზონში, რაფინიას ანგარიშზე 13 მატჩი, 9 გოლი და 8 ასისტია. მან გუშინ მანუელ ნოიერს ჰეთ-თრიქი შეუსრულა და დაფრინავდა. ბრაზილიელს მატჩის საუკეთესო ფეხბურთელის პრიზი ტერ შტეგენმა გადასცა.