რაფინიას საუდი პრო ლიგიდან დაუკავშირდნენ

ფაბრიციო რომანოს ინფორმაციით, საუდი პრო ლიგაში გადაბარგებასთან დაკავშირებით შუამავლები რაფინიას დაუკავშირდნენ.

წარმომადგენლებმა ბრაზილიელს პოტენციურ ტრანსფერზე გამოჰკითხეს და ფეხბურთელისგან უარი მიიღეს. რაფინიას გეგმები ნათელია: მას ბარსელონაში დარჩენა სურს და საუდის არაბეთში გადასვლას არ აპირებს.

27 წლის შემტევის მიზანია, ჰანსი ფლიკს თავი მოაწონოს და მისი გუნდის მნიშვნელოვანი წევრი გახდეს. Sport-ის ცნობით, ბრაზილიელ ვინგერს "ბლაუგრანაში" არა მხოლოდ კონტრაქტის ამოწურვამდე (2027 წლამდე) დარჩენა, არამედ მისი გახანგრძლივებაც სურს. თუმცა, ბარსა მზადაა, მიმდინარე სატრანსფერო ფანჯარაზე ის €60 მილიონად გაყიდოს.

რაფინია ბარსელონაში ვარჯიშს მალე განაახლებს. მას წინასასეზონო მზადება ჯერ არ დაუწყია, რადგან კოპა ამერიკაზე ასპარეზობდა.

ბრაზილიელმა გასულ სეზონში ლურჯ-ბროწეულისფერი მაისურით 37 მატჩი ჩაატარა, 10 გოლი გაიტანა და 13 ასისტი მიითვალა.