რატომ გაიტანა რონალდინიომ ბარსელონაში სადებიუტო გოლი შუაღამით?

ალბათ, ეს გოლი ყველას უამრავჯერ გინახავთ, მაგრამ იცოდით, რომ "სევილიასთან" მატჩი ადგილობრივი დროით (CET) 00:05 საათზე დაიწყო?

მეტიც, რონალდინიომ გოლი 58-ე წუთზე, შესაბამისად, საფეხბურთო მატჩისთვის უჩვეულო დროს - ღამის 01:30 საათზე გაიტანა. ისმის კითხვა: რატომ?

Tribuna-ს ინფორმაციით, "ბარსელონას" მატჩის ჩატარების თარიღის შეცვლა სჭირდებოდა, რადგან სანაკრებო პაუზა მოახლოებული იყო და რონალდინიოს ეკვადორთან შეხვედრისთვის ბრაზილიაში გამგზავრება უწევდა. ჟოან ლაპორტას მატჩის ჩატარება სამშაბათს სურდა, მაგრამ "სევილია" დაჟინებით ითხოვდა, რომ შეხვედრა ოთხშაბათს გამართულიყო, რადგან იცოდა, რომ სხვა შემთხვევაში "ბარსას" გაუჩო ეყოლებოდა. საბოლოოდ, "ბარსელონამ" იმას მაინც მიაღწია, რომ მატჩი ოთხშაბათს, მაგრამ მაქსიმალურად ადრე ჩატარებულიყო.

მიუხედავად იმისა, რომ შეხვედრა შუაღამით იმართებოდა, "კამპ ნოუზე" 80 000-ზე მეტი ქომაგი შეიკრიბა. როგორ შეძლო ლაპორტამ, რომ ფანები ასეთ დროს წაეხალისებინა და, რაც მთავარია, ფხიზლად ემყოფებინა? ჟოანმა მათ სასუსნავები და სასმელი დაურიგა და ასევე, The Three Tenors ამღერა. სწორედ ამიტომ, ეს საღამო "გასპაჩოს საღამოს" სახელითაა ცნობილი. ამასთან, ლაპორტამ "ბარსას" მუზეუმი შუაღამემდე ღია დატოვა, რათა ხალხი გაერთო.

პრეზიდენტის ამდენი ძალისხმევის მიუხედავად, "ბარსელონამ" მატჩი ვერ მოიგო (1-1), მაგრამ რონალდინიოს გოლი ყველას სამუდამოდ დაამახსოვრდა.