ავტორიზაცია
რატომ ვერ მიაღწია ბელგიის "ოქროს თაობამ" წარმატებებს? - რაჯა ნაინგოლანის ახსნა
ყოფილმა ბელგიელმა ფეხბურთელმა, რაჯა ნაინგოლანმა ბელგიის ნაკრების "ოქროს თაობის" წარუმატებლობის მიზეზზე ისაუბრა.
"ვფიქრობ, რომ გუნდში ძალიან ბევრი ვარსკვლავი იყო. ისეთ მოთამაშეებს, როგორებიც რომელუ ლუკაკუ, ედენ აზარი, კევინ დე ბრუინი და ტიბო კურტუა არიან, ყოველთვის პირველობა სურთ, რაც გუნდზე უარყოფითად აისახება.
მსგავსი რამ მოხდა პარი სენ-ჟერმენის შემთხვევაშიც: ლეო მესი, ნეიმარი და კილიან მბაპე - სამივე მათგანს ლიდერობა სურდა და არა გუნდურობა," - განაცხადა ნაინგოლანმა.
ბელგიის ნაკრებში რაჯას დებიუტი 2009 წელს შედგა. 2018 წელს, მას შემდეგ, რაც მუნდიალზე არ წაიყვანეს, ნაინგოლანმა სანაკრებო კარიერა დაასრულა. რაც შეეხება საკლუბო კარიერას: მან წინა სეზონი ინდონეზიურ ბჰაიანგკარაში გაატარა, ამჟამად კი თავისუფალი აგენტია.
ბელგიის "ოქროს თაობა" ტიტულის მოგებასთან ყველაზე ახლოს 2018 წელს იყო - "წითელი ეშმაკები" მსოფლიო ჩემპიონატის ნახევარფინალში გავიდნენ, მაგრამ მომავალ ჩემპიონ საფრანგეთთან წააგეს. საბოლოოდ, მათ მესამე ადგილისთვის მატჩში ინგლისი დაამარცხეს და ბრინჯაოს მედალი მოიპოვეს.
