რიკელმე ეცდება კავანი ბოკა ხუნიორსში გადასვლაში დაარწმუნოს

"მანჩესტერ იუნაიტედის" თავდამსხმელი, ედინსონ კავანი ზაფხულში შეიძლება "ბოკა ხუნიორსში" გადავიდეს.

როგორც fichajes.net იტყობინება, ფორვარდის დათანხმებას არგენტინული კლუბის ვიცე-პრეზიდენტი, "ბარსელონასა" და "ვილიარეალის" ექს-ნახევარმცველი, ხუან რომან რიკელმე ეცდება.

რიკელმეს გუნდში ვარსკვლავური ვეტერანების გაერთიანება სურს - "ბოკას" შეტევაში უკვე თამაშობს 36 წლის კარლოს ტევესი.

მარტის დასაწყისში 34 წლის ურუგვაელის მამამ, ლუის კავანიმ განაცხადა, რომ ფორვარდი ინგლისში ბედნიერი არ არის და სახლთან ახლოს უნდა გადასვლა.

კავანი "მანჩესტერ იუნაიტედში" გასულ შემოდგომაზე გადავიდა. მიმდინარე სეზონში მან ყველა ტურნირზე ერთად 25 მატჩი ჩაატარა და 7 გოლი გაიტანა.