რონალდუს რეკორდის დამხობასთან ახლოს - ჰოლანდის საოცარი სტატისტიკა

ერლინგ ჰოლანდი დიდებულ ფორმაშია და დღეს ჩემპიონთა ლიგაზე მე-6 სეზონს გახსნის. აღნიშნულ ტურნირზე მიდი დებიუტი ზალცბურგის მაისურით შედგა.

მოგეხსენებათ, წელს ჩემპიონთა ლიგა განახლებული ფორმატით ტარდება, რაც ნორვეგიელი თავდამსხმელისთვის კარგია, რადგან მეტი მატჩის ჩატარება მოუწევს და, შესაბამისად, მეტი შანსი, რომ კრიშტიანუ რონალდუს ევროპის ყველაზე პრესტიჟული საკლუბო ტურნირის ყველა დროის საუკეთესო ბომბარდირის სტატუსი ჩამოართვას.

 

ჰოლანდმა ჩემპიონთა ლიგაზე, სადებიუტო მატჩში გენკის წინააღმდეგ ჰეთ-თრიქი შეასრულა და პირველი ფეხბურთელი გახდა. ვინც ეს შეძლო. ამასთან, მან პირველ 5 შეხვედრაში გაიტანა, რაც ისტორიაში მხოლოდ ალესანდრო დელ პიეროსა და დიეგო კოსტას გაუკეთებიათ.

დორტმუნდში გადასვლის შემდეგ ერლინგი ყველაზე ახალგაზრდა ფეხბურთელი გახდა, ვინც ჩემპიონთა ლიგაზე 15 გოლი გაიტანა და თანაც, ყველაზე სწრაფად.

ამასთან, ის ერთადერთია, ვინც 3 სხვადასხვა კლუბის მაისურით ხსენებულ ტურნირზე სადებიუტო შეხვედრაში გაიტანა.

ამჟამად, ჰოლანდს ჩემპიონთა ლიგაზე გამართულ 39 მატჩში 41 გოლი აქვს და ლეო მესის რეკორდის დამხობას უახლოვდება, როგორც ყველაზე ახალგაზრდა ფეხბურთელი, რომელმაც 50 გოლი გაიტანა. ამასთან, სავარაუდოდ, ის რუდ ვან ნისტელროის შედეგსაც გააუმჯობესებს, რომელმაც ამ ნიშნულს ყველაზე ცოტა შეხვედრაში მიაღწია.

ნორვეგიელი, მესისა და ლუის ადრიანოსთან ერთად, იმ ფეხბურთელთა სამეულშია, რომლებმაც ჩემპიონთა ლიგის 1 მატჩში 5 გოლი გაიტანეს. ის პეპ გვარდიოლას 63-ე წუთზე რომ არ შეეცვალა, დიდი ალბათობით, ლაიფციგს კიდევ გაუტანდა.

ერლინგი ჩემპიონთა ლიგის 2022-23 წლების სეზონის საუკეთესო ბომბარდირი გახდა და წელს კიდევ უფრო კარგ ფორმაშია. ვინაიდან ნორვეგია ევროპის ჩემპიონატზე არ იყო, ჰოლანდმა ზაფხულში დაისვენა და ძალები მოიკრიბა.

პეპ გვარდიოლამ ცოტა ხნის წინ აღნიშნა, რომ ჰოლანდის გოლების გატანაში მესისა და რონალდუს ჰგავს. ამ მომენტისთვის, სიტის რიგებში, ერლინგის ანგარიშზე 103 მატჩში 99 გოლია. თუ ის დღეს ინტერს გაუტანს, რონალდუს რეკორდს დაამხობს, რომელსაც რეალ მადრიდში 100 გოლის გასატანად 105 მატჩი დასჭირდა.

რონალდუ (140 გოლი ჩ. ლიგაზე) ალბათ ფიქრობდა, რომ ჩემპიონთა ლიგის ყველა დროის საუკეთესო ბომბარდირის სტატუსი სამუდამოდ შენარჩუნებული ჰქონდა, განსაკუთრებით ევროპიდან მესის (129 გოლი ჩ. ლიგაზე) წასვლის შემდეგ, თუმცა საქმე ასე მარტივად აღარაა. კრიშტიანუმ ჩემპიონთა ლიგაზე 19 სეზონი ჩაატარა და მონაწილეობა 183 შეხვედრაში მიიღო, ბოლო მატჩი კი 37 წლის ასაკში ჰქონდა. საპირისპიროდ, ჰოლანდმა, რომელიც 24 წლისაა, ჯერ მხოლოდ 5 სეზონი ითამაშა - თუ ის გოლების გატანას ამ ტემპში გააგრძელებს, რონალდუს რეკორდს 34 წლის ასაკში, 133 მატჩში მოხსნის.

კილიან მბაპეს, რომელიც ჰოლანდზე 17 თვით უფროსია, ჩემპიონთა ლიგაზე 74 მატჩში 49 გოლი აქვს - ფრანგის, საშუალოდ, 0.66 გოლს იტანს, ერლინგი კი - 1.05-ს.

ისტორიულად, ტოპ ფეხბურთელებს პიკი დაახლოებით 26 წლის ასაკში აქვთ. მაგალითად, რონალდუმ ჩემპიონთა ლიგის ერთ სეზონში ყველაზე მეტი (17) გოლი 29 წლის ასაკში გაიტანა, მესიმ კი - 25-ის.

დიდი ალბათობით, ერლინგ ჰოლანდს საუკეთესო წლები ჯერ კიდევ წინ აქვს და შეუძლია, გოლების მაჩვენებელი გააუმჯობესოს. იმ შემთხვევაშიც კი, თუ ნორვეგიელი ამჟამინდელ ტემპს შეინარჩუნებს, მატჩების გაზრდილი რაოდენობის ფონზე, მაინც შეუძლია, ჩემპიონთა ლიგის ყველა დროის საუკეთესო ბომბარდირი გახდეს. ტურნირის ახალი ფორმატი მისთვის შანსია, საკუთარი კვალი დატოვოს.