სეზონის პრევიუ | ბაიერნი 2024/25 - რა იქნება ვენსან კოპმანის გუნდის მაქსიმუმი?

გერმანიის ყველაზე წარმატებულ კლუბს, ბაიერნს 2023/24 წლების სეზონი რთული ჰქონდა. მიუნხენელებმა ზედიზედ 11 ბუნდესლიგა მოიგეს, მაგრამ გასულ წელს, ყველასთვის მოულოდნელად, ჩემპიონი ლევერკუზენი გახდა და "რეკორდმაისტერს" 17 ქულით გაასწრო. მათზე წინ შტუტგარტიც კი გავიდა, რომელმაც მე-2 ადგილი დაიკავა.

ბაიერნმა ტომას ტუხელი დაკავებული თანამდებობიდან გაათავისუფლა და მთავარ მწვრთნელად ვენსან კომპანი დანიშნა, რომელიც 2023/24 წლების სეზონში ბარნლისთან ერთად პრემიერ ლიგიდან გავარდა. ჯერ ვერ ვიტყვით, ბელგიელი სპეციალისტი თავისი ახალი შეგრიდებისგან მაქსიმუმის მიღებას შეძლებს თუ არა. ყველა ელოდება, რომ ბაიერნი ჩემპიონთა ლიგასა და გერმანიის თასზეც იბრძოლებს, მაგრამ საკითხავია, ამ სეზონში ისინი ტრებლს რამდენად შეასრულებენ.

ბაიერნის ქომაგებმა იცოდნენ, რომ ბუნდესლიგაში ჩემპიონობების სერია სამუდამოდ არ გაგრძელდებოდა, მაგრამ ლევერკუზენთან ბრძოლის წაგება მაინც მტკივნეული იყო. ასევე, კლუბს არასასურველი ფეხბურთელების გაყიდვა გაუჭირდა, თუმცა კომპანისთან ერთად გუნდს ახალი იმედები აქვს. 

მიუხედავად იმისა, რომ კომპანი ტუხელის შეცვლის პრიორიტეტული კანდიდატი არ იყო, მან ფანების გული მალევე მოიგო. გუნდი პროგრესირებს, ბელგიელს კი გულშემატკივრებთან ახლა ურთუერთობა აქვს. ვენსანს დიდი სამწვრთნელო გამოცდილება არ გამოარჩევს, მაგრამ ქომაგებს უკვე სჯერათ, რომ ის ბაიერნის გასაძღოლად სწორი ადამიანია. თუმცა, თუ პერფორმანსები კარგი არ იქნება, რა თქმა უნდა, ბელგიელი წნეხის ქვეშ მოექცევა. ბაიერნს განსაკუთრებით მნიშვნელოვანი მატჩი მე-5 ტურში, ლევერკუზენის წინააღმდეგ ელის.

ბაიერნმა მიმდინარე სატრანსფერო ფანჯარაზე 5 ფეხბურთელი შეიძინა: 21 წლის გერმანელი შემტევი არმინდო ზიები (იჯარით მაინციდან), იაპონელი მცველი ჰიროკი იტო (შტუტგარტიდან), ფრანგი გარემარბი მაიკლ ოლისე (კრისტალ პალასიდან) და პორტუგალიელი ნახევარმცველი ჟოაუ პალინია (ფულემიდან). ჯამში, კლუბის დანახარგი €104 მილიონს შეადგენს. 

მიუნხენელებმა რამდენიმე მოთამაშე გაყიდეს: მალიკ ტილმანი (პსვ-ში), მატიას დე ლიხტი და ნუსაირ მაზრაუი (ორივე მანჩესტერ იუნაიტედში). ამასთან, კლუბი, შესაძლოა, კინგსლი კომანმა და ლეონ გორეცკამ დატოვონ. გარდა ამისა, გუნდის მწნიშვნელოვან წევრებს - იოზუა კიმიხს, ალფონსო დევისსა და ლეროი სანეს კონტრაქტები 1 წელში ეწურებათ, რაც ნიშნავს, რომ თუ ხელშეკრულებები არ განახლდება, ბაიერნმა, შესაძლოა, მათ გაყიდვაზეც იფიქროს, რათა მომავალ ზაფხულში ეს მოთამაშეები უფასოდ არ დაკარგოს.

ბაიერნს ლევერკუზენიდან ჯონათან ტას დამატება სურდა, მაგრამ ტრანსფერი ჩაიშალა. სავარაუდოდ, სატრანსფერო ფანჯრის დახურვამდე, კლუბი გაძლიერებას კიდევ შეეცდება.

კომპანიმ მიუნხენური კარიერა როტახ-ეგენთან 14-1 მოგებით დაიწყო (ამ შეხვედრაში ახალგაზრდა მატის ტელმა ჰეთ-თრიქი შეასრულა), თუმცა მომდევნო მატჩი რთული გამოდგა: გუნდმა დურენს ვერ მოუგო (1-1).

ამის შემდეგ "რეკორდმაისტერი" სამხრეთ კორეაში გაემგზავრა და ტოტენჰემს 2-1 მოუგო - გოლები გაბრიელ ვიდოვიჩმა და ლეონ გორეცკამ გაიტანეს. ისინი სპურსს ისევ, ამჯერად ლონდონში შეხვდნენ, კარში 21-ჯერ დაურტყეს და 3-2 დაამარცხეს.

კომპანი გუნდის დისციპლინით კმაყოფილი იყო. გუნდმა კარგი სერია ტიროლთან (3-0) მოგებით განაგრძო, სადაც ჰარი კეინმა გაიტანა. ვენსანის შეგირდებმა გერმანიის თასზე ულმს 4-0 მოუგეს, შემდეგ კი კიდევ ერთი ამხანაგური მატჩი გამართეს, რომელშიც გრასჰოპერსი ასევე 4-0 დაამარცხეს - ამ შეხვედრაში მაიკლ ოლისემ სადებიუტო გოლი შეაგდო.

საბოლოო ჯამში, თავდაპირველი შედეგები პოზიტიურია და აჩვენებს, რომ ფეხბურთელები კომპანის სტილთან ადაპტაციას უპრობლემოდ გადიან.

გასულ სეზონში კომპანის ბარნლი ძალიან ცუდი იყო. კლუბმა 10 ფეხბურთელში £90 მილიონი დახარჯა, მაგრამ მათ პრემიერლიგური გამოცდეილება არ ჰქონდათ და გაუჭირდათ. სეზონის მიმდნარეობისას ტაქტიკის ცვლილების მიუხედავად, "კლარეტები" უმაღლეს დივიზიონში დასარჩენად საკმარისად ძლიერები არ გამოდგნენ.

ბარნლის ჩავარდნას ბევრი სწორედ კომპანის აბრალებდა. ერთ-ერთ ვიდეოში, რომელიც სავარჯიშო სესიაზეა გადაღებული, ჩანს, რომ ბელგიელი აშკარად უმაყოფილო იყო, თუმცა, ის საკუთარ პრინციპებს ბოლომდე ენდო.

ბაიერნმა, სავარუდოდ, კომპანის დანიშნა ბარნლისთან ერთად ჩემპიონშიფში ნაჩვენები შედეგების გამო გადაწყვიტა, სადაც მისი გუნდი ჩემპიონი 100 ქულით გახდა. ვენსანის ტაქტიკები შესანიშნავი იყო - მისი შეგირდები დაცვიდან შეტევაში სწრაფად გადადიოდნენ და სივრცეებს ეძებდნენ. უბურთოდ ყოფნისას, ბარნლი რამდენიმე ფორმაციას მიმართავდა და მეტოქეს აპრესინგებდა.

ბაიერნში კომპანის ბევრად უფრო ტექნიკური და ათლეტური ფეხბურთელები ჰყავს, რაც მას თავისი ფილოსოფიის ბევრად ეფექტიანად გამოყენებაში უნდა დაეხმაროს.

გასულ სეზონში ინგლისელი ბაიერნის იმ მცირე ფეხბურთელთა შორის იყო, რომლებმაც კარგად ითამაშეს. მიუხედავად იმისა, რომ მიუნხენურმა გრანდმა ბოლო 12 წლის განმავლობაში ტიტული პირველად ვერ მოიგო, კეინმა 44 გოლი გაიტანა. მან რობერტ ლევანდოვსკი იდეალურად შეცვალა. გოლების გატანის გარდა, ის თანაგუნდელებთანაც შესანიშნავად შეთამაშდა და ჯამალ მუსიალასა და ლეორი სანესთან თავისუფლად კომბინირებდა.

თუ კეინი მიმდინარე სეზონშიც ასე ითამაშებს, პლუს მაიკლ ოლისეს დანამატის ფონზე, ბაიერნის შეტევა საკმაოდ სახიფათო იქნება. შესაბამისად, დიდი შანსია, კომპანის გუნდმა ლევერკუზენს კონკურენცია გაუწიოს და ჩემპიონთა ლიგაზეც ანგარიშგასაწევი ძალა იყოს. მნიშვნელოვან მატჩებში, შესაძლოა, კეინის როლი გადამწყვეტი აღმოჩნდეს.

აღსანიშნავია, რომ ბაიერნი ფრთხილად უნდა იყოს, რადგან კეინი ევრო 2024-ზე კარგი არ ყოფილა. მან 3 გოლი გაიტანა, მაგრამ, საერთო ჯამში, ცუდი პერფრომანსები ჰქონდა. თუმცა, მიუხედავად იმისა, რომ ჰარი ამას უაროფს, ფაქტია, რომ ინგლისელი ტურნირზე სათამაშოდ, ფიზიკურად სრულად მზად არ იყო. ამის გამო გერმანულმა კლუბმა მისი დატვირთვა არ უნდა იჩქაროს.

სეზონის პირველ ნახევარში მოთამაშეებისთვის კომპანის მენეჯერული უნარები მნიშვნელოვანი იქნება.

Sky Germany-ის თანახმად, კომპანის მაროკოელი მარცხენა მცველი, ადამ აზნუ ძალიან მოსწონს. 18 წლის ფეხბურთელი ბაიერნმა 2022 წელს, ბარსელონადან დაიმატა. მას პირველ გუნდში ჯერ არ უთამაშია, მაგრამ გასულ სეზონში 19-წლამდელთა გუნდში შესანიშნავი იყო და სარეზერვო გუნდშიც 11 მატჩი ჩაატარა.

პრესეზონზე აზნუმ პირველ გუნდში შანსი მიიღო და ტიროლის წინააღმდეგ მოედანზე 90 წუთი გაატარა. ის ძალიან აქტიური იყო, კარგი ჩაწოდებები განახორციელა და მოედნის ცენტრში თავდაჯერებულად გადაადგიულებოდა.

ბაიერნის ხელმძღვანელობა ადამს ალფონსო დევისის პოტენციურ შემცვლელად ხედავს. კანადელი 2025 წელს თავისუფალი აგენტი გახდება და, სავარაუდოდ, რეალში გადავა. თუ დევისი წავა, აზნუმ, შესაძლოა, მისი ადგილი დაიკავოს.

ვენსან კომპანის, მისიის მინიმუმის შესასრულებლად, ბუნდესლიგის მოგება სჭირდება, თუმცა, შესაძლოა, სამსახური ამ შემთხვევაშიც კი ვერ შეინარჩუნოს. მისთვის მნიშვნელოვანი იქნება, რომ გუნდი ჩემპიონთა ლიგას ნაადრევად არ გამოეთიშოს.

გასულ სეზონში, ბაიერნი ნახევარფინალში რეალს რომ გასცდენოდა, ალბათ, ტომას ტუხელს ახალ კონტრაქტს შესთავაზებდნენ, თუმცა გუნდმა წააგო და გერმანელი სპეციალისტი სეზონის ბოლოს გაუშვეს. "რეკორდმაისტერის" ბოსები ბუნდესლიგის მოგებასა და ჩემპიონთა ლიგაზე კარგ შედეგებს ელოდებიან.

კომპანის ბაიერნის სწორად ორგანიზება მართებს, რაც გუნდს ტუხელის ხელში აკლდა - ეს ნიშნავს ეფექტიან ტაქტიკებს, ფეხბურთელებისგან მაქსიმუმის მიღებასა და შეცდომების თავიდან არიდებას.

ბაიერნს მუსიალას, სანეს, გნაბრის, ოლისეს, ტელისა და კეინის სახით ძლიერი თავდასხმა ჰყავს. თუმცა, თუ კიმიხი წავა, ნახევარდაცვა დასუსტდება. ამასთან, უნდა აღინიშნოს, რომ გასულ სეზონში დაიო უპამეკანოსა და კიმ მინ-ჯეს ტანდემი დამაჯერებლად არ გამოიყურებოდა.

ამრიგად, სანამ ბაიერნი გაძლიერდება და ტიტულს მოიგებს, ფანებმა უნდა გაანალიზონ, გუნდის მაქსიმუმი რა იქნება და მოლოდინები ამის მიხედვით დაარეგულირონ. მეტი ტრანსფერის გარეშე, დიდი წარმატებების მიღწევა მარტივი არ იქნება.

სეზონის საუკეთესო ფეხბურთელი: ჯამალ მუსიალა | მოსალოდნელია, რომ გერმანელი ბაიერნისთვის მნიშვნელოვანი ფიგურა იქნება. გუნდი მისგან ბევრ გოლსა და ასისტს მოელის. ჯამალმა ევროიპის ჩმეპიონატზე შესანიშნავად ითამაშა და მზადაა, კლუბის ლიდერიც გახდეს.

დიდი იმედგაცრუება: მანუელ ნოიერი | 38 წლის მეკარეს აშკარა რეგრესი აქვს და, შესაძლოა, მისი შეცდომების გამო ბაიერნი ბევრჯერ დაისაჯოს.

საუკეთესო შენაძენი: მაიკლ ოლისე | თუ ფრანგი ჯანმრთელი იქნება, შეუძლია, ბაიერნის შეტევის ერთ-ერთი ლიდერად მოგვევლინოს. ის ბურთთან ერთად ბრწყინვალეა და საგოლე მომენტებს შემქნის. ასევე, აღსანიშნავია, რომ ოლისემ, შესაძლოა, ჯარიმებიც გაიტანოს.

საუკეთესო ბომბარდირი: ჰარი კეინი | ინგლისელი, რომელმაც გასულ სეზონში ბუნდესლიგაში გატანილი გოლებით კინაღამ ლევანდოვსკის რეკორდი მოხსნა, სავარაუდოდ, მიმდინარე სეზონშიც 30-ზე მეტ გოლს გაიტანს. კეინი მსოფლიოში ერთ-ერთი საუკეთესო თავდამსხმელია და ახალწვეულების დახმარების ფონზე, მას, შესაძლოა, კიდევ უფრო უკეთესი სტატისტიკა ჰქონდეს.

მაქსიმუმი ჩემპიონთა ლიგაზე: მეოთხედფინალი | ბაიერნი, სავარაუდოდ, 1/4-ფინალში წააგებს. რეალის, მანჩესტერ სიტისა და ლივერპულისნაირი გუნდები მათთან ფავორიტები იქნებიან და, შესაძლოა, ლევერკუზენი, ინტერი და ბარსელონაც კი...

ადგილი ბუნდესლიგაში: მე-2 | ბაიერნი, ალბათ, გერმანიის ჩემპიონატში მეორე პოზციას დაიკავებს. ამ ეტაპზე, ლევერკუზენი უკეთესი გუნდია და ტიტულის შენარჩუნება უნდა შეძლოს, თუმცა 2024/25 წლების სეზონში მიუნხენელები მათ უფრო ძლიერ კონკურენციას გაუწევენ.