შეთანხმება მიღწეულია, პირობები ცნობილი — რენატუ სანჩეში კარიერას პსჟ-ში გააგრძელებს
"ლილის" ნახევარმცველი, რენატუ სანჩეში "პარი სენ ჟერმენში" გადასვლასთან ახლოს არის, იტყობინება ცნობილი გამოცემა O Jogo.
გავრცელებული ინფორმაციით, კლუბები პორტუგალიის ეროვნული ნაკრების 24 წლის ფეხბურთელის იჯარაზე შეთანხმდნენ, 10 მილიონ ევროდ შემდგომი გამოსყიდვის უფლებით.
როგორც აღინიშნება, სანჩეშის ტრანსფერი შესაძლოა ხვალამდეც გაოფიციალურდეს.
აქამდე არსებული ცნობით, "პარი სენ ჟერმენში" ახალგაზრდა ცენტრალური ნახევარმცველი წლიური ხელფასის სახით 5 მილიონ ევროს გამოიმუშავებს.
მოგეხსენებათ, რენატუ "ლილში" "ბაიერნიდან" 2019 წლის ზაფხულში გადავიდა. 2021 წელს მან გუნდთან ერთად ლიგა 1 მოიგო და მაშინ მას პარიზელთა ამჟამინდელი მთავარი მწვრთნელი, კრისტოფ გალტიე წვრთნიდა.
გასულ სეზონში სანჩეშმა ყველა ტურნირზე ერთად 31 მატჩი ჩაატარა, 2 გოლი გაიტანა და 5 ასისტიც მიითვალა.
